Ataque Escampe
![]() | Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo. (Desde xuño de 2016.) |
Ataque Escampe | |
---|---|
![]() Ataque Escampe en 2017. | |
Orixe | Santiago de Compostela, ![]() |
Xénero(s) | Rock alternativo |
Selo(s) discográfico(s) | A Regueifa Plataforma Discos da máquina Tremendo Audiovisual |
Membros | Miguel Mosqueira Samuel Solleiro Xoán Lois García Carlín Álex Charlón Cibrán Tenreiro |
Antigos membros | Roi Vidal Julio Vilariño Estevo Francesc Esteve i Beneito (Paq) Marco Gelpi Álvaro Trillo Pablo Casal Dani |
Na rede | |
Web oficial | |
![]() ![]() ![]() ![]() ![]() ![]() |
Ataque Escampe é un grupo musical de pop galego formado en 2001 en Compostela. Levan publicados oito álbums de estudo.
Membros actuais
[editar | editar a fonte]- Miguel Mosqueira: guitarras, voz e coros.
- Samuel Solleiro: guitarras e coros.
- Xoán Lois García Carlín: baixo e teclados.
- Álex Charlón: voz.
- Cibrán Tenreiro: batería, percusión e coros.
Historia
[editar | editar a fonte]Orixes
[editar | editar a fonte]Ataque Escampe formouse a finais de 2001, arredor da residencia universitaria Monte da Condesa. A mediados de 2002, o grupo, con cinco membros, Samuel, Álex, Miguel, Roi e Estevo, deu algúns concertos como o celebrado no Coliseo Noela de Noia con motivo do 1º concerto expansivo Nunca Máis, organizado por Burla negra.[1] Entre 2002 e 2003 gravaron maquetas inéditas en formatos como casete ou mini-disc. Nelas xa se ía albiscando o estilo dos dous primeiros discos: un son acústico e sucio, certo eclecticismo e letras irónicas que deixaban atrás a inmediatez do bravú, aínda imperante na época. 2004 e 2005 son anos de traxectoria descontinua debido á dispersión xeográfica dos compoñentes do grupo. Porén, non deixroan de compoñer temas e gravar maquetas en formatos precarios.
Inicio da actividade regular
[editar | editar a fonte]![](http://upload.wikimedia.org/wikipedia/commons/thumb/c/c9/Ataque_Escampe_2007.jpg/220px-Ataque_Escampe_2007.jpg)
O 2006 foi un punto de inflexión na traxectoria do grupo, ao gañar co tema "Afganistán canto" o I Premio de canción de autor Utopía Son, celebrado no Café Uf de Vigo. Os catro membros, Samuel, Álex, Miguel e Roi, investiron os cartos do premio en equipamento técnico básico e iniciaron aos poucos unha actividade regular de concertos.
En 2007 editaron o seu primeiro traballo, concibido como maqueta para presentar nos locais e conseguir concertos. Levaba por título Ed Wood e a invasión dos paraugas asasinos. Foi publicado só en formato electrónico e baixo licenza Creative Commons en A Regueifa Plataforma, con temas gravados nun home studio e outros gravados en directo con mini-disc no Café Uf. Nese mesmo ano participaron no disco-tributo a Andrés do Barro Manifesto Dobarrista, editado conxuntamente pola Regueifa Plataforma, Falcatruada e Lonxa Cultural e que reunira o panorama de grupos novos daqueles últimos anos. Nese disco realizaron unha versión da canción do artista ferrolán "Para che falar de amor", que interpretaron tamén na gala homenaxe Saudade de ti, na TVG. Samuel Solleiro foi baixa temporal e entrou no grupo o guitarrista Marco Gelpi. Finalmente, Ataque Escampe acadou o 1º Premio do certame Gz Crea 2007 na modalidade de música, coas cancións "Tango do sintasol" e "Ana e o caracol".
A principios de 2008 incorporouse o acordeonista Francesc Esteve, Paq e en marzo publicaron o seu primeiro LP, no selo A Regueifa Discos (sección da Regueifa Plataforma para edicións físicas). O título, Galicia es una mierda, decidiuse nunha enquisa aberta na web da banda. O agora sexteto presentou o disco por toda Galiza e varias cidades dos Países Cataláns e gravou varios temas soltos, entre eles "Unha tarde no zoo" (baixo o pseudónimo de Paul á sombra para o concurso A Polo Ghit da Radio Galega) ou "Ningún lugar seguro (GalegoZ Remix)", para o compilatorio Once máis 15 (Edicións do Cumio).
En 2009 editouse o EP Galicia es una fiesta, onde Marcos Paino (Dr. Painkiller) remesturou cinco temas de Galicia es una mierda. Paq abandonou o grupo e entrou Lois, en principio a cargo dos teclados e os sintetizadores. O grupo tamén incorporou unha batería electrónica e un banxo. O resultado foi un son máis sofisticado e luminoso, con pequenos matices electrónicos, que se fixo patente no LP A grande evasión, gravado por Marcos Paino e publicado en maio por A Regueifa Discos. A banda volve transmutarse en Paul á sombra no tema "O noso contrato coa Virgin" e deu o primeiro concerto fóra do estado, en Varsovia.
En 2010 estreouse a curta Zéfiro, ambientada nun concerto de Ataque Escampe e realizada por alumnos da Escola de Produción Audiovisual de Ourense. Marco abandonou o grupo, Lois pasou a ocuparse do baixo e Roi a tocar unha batería convencional. Co tema "Desde o céu com amor", Ataque Escampe participou no concurso "Musicando Carvalho Calero".
En 2011 a banda gravou nos estudios Abrigueiro de Arturo Vaquero o seu terceiro LP, Violentos anos dez ,[2] o derradeiro publicado por A Regueifa Discos. Este traballo supuxo un achegamento ás músicas negras, en particular ao soul. Por primeira vez a instrumentación clásica dunha formación rock (guitarras, baixo, batería) estivo presente tanto na gravación como no directo. O disco foi o terceiro mellor LP galego do ano para a revista Mondosonoro.
Etapa profesional
[editar | editar a fonte]![](http://upload.wikimedia.org/wikipedia/commons/thumb/a/a8/Ataque_Escampe_Liceo_Mutante_2014.jpg/220px-Ataque_Escampe_Liceo_Mutante_2014.jpg)
En 2012 Ataque Escampe participou no disco-homenaxe a Os Resentidos A tribo toda baila cunha versión do tema "Música feliz". Tamén deu un concerto especial en Compostela, conmemorativo dos dez anos de directos, "Dez violentos anos".[3] En decembro participou na fundación do selo cooperativo Discos da Máquina canda as bandas Das Kapital e A Magnifique Bande dos Homes sen Medo, cun concerto na sala Capitol de Compostela no que tamén se presentou a primeira referencia do selo, o EP Noites de agosto con Ataque Escampe. Neste traballo de corte crepuscular, gravado por Tomás Ageitos nos estudios A Ponte, o grupo diversificou as influencias de estilos musicais dispares, como o krautrock, o bolero, a cumbia ou o calipso ao tempo que se asentou nunha sonoridade pop.
En 2013 o grupo colaborou no libro-cd infantil Os Bolechas fan unha banda, coa canción "After Hours". No verán organizaron unha serie de sesións de improvisación nas que compuxeron a maior parte dos temas para o seu próximo LP. Tralo verán, a banda tomou un descanso dos escenarios que durou até a primavera de 2014. Este descanso só se interrompeu en decembro para tocar no festival Máis discos para a máquina, organizado por Discos da Máquina no primeiro aniversario da súa creación, neste momento con novos membros como Grampoder, Caxade ou The Lost Omelette-makers. O 28 de decembro de 2013 publicouse tamén, a modo de brincadeira, un hoax: o LP Vive ou morre, que só permaneceu publicado 24 horas en Internet, no que a banda, baixo a aparencia de títulos evocadores, agochou a gravación con micrófono de ambiente de cancións populares a capela nunha noite de esmorga.
2014 foi o ano da edición do LP O disco vermello. Neste disco, gravado por Arturo Vaquero e editado por Discos da Máquina, Ataque Escampe deu o paso da súa profesionalización definitiva coa incorporación do batería de jazz Álvaro Trillo. Roi Vidal pasou a ocuparse do xilófono, da melódica e, progresivamente, da voz principal. Neste disco, Ataque Escampe consolidou un son pop con momentos electrónicos e a influencia rítmica de estilos como o dub ou o funk, para contar historias de perdedores por medio duns textos máis contidos que en traballos anteriores. O disco editouse en maio e o grupo retomou a actividade de directo nun formato integramente eléctrico, que combinaba puntualmente con espectáculos acústicos. Neste mesmo ano, o grupo participou no compilatorio Monstros da máquina vol. I de Discos da Máquina co tema "Evita", gravado en colaboración co grupo de música electrónica Sub Rosa. O 29 de novembro, Ataque Escampe encargouse do concerto de clausura das Marchas da dignidade. En decembro, Ataque Escampe recibiu o Premio Martín Códax da Música na categoría indie / pop.
2015 comezou coa ausencia do vocalista Álex Charlón nos concertos. Tamén finalizou con éxito o crowdfunding do libro Relatos americanos en colaboración co artista plástico Misha Bies Golas, no que os textos narraban episodios estraños que lles sucederan á banda en concertos. En xuño dese ano confirmouse a saída definitiva de Álex a través dun comunicado do grupo e outro do propio vocalista na páxina web. Un concerto na Sala Capitol de Compostela o 19 de xuño supuxo a súa despedida oficial.
En febreiro de 2017 presentaron o seu disco Primeiros bicos, con chiscadelas aos ritmos latinos e ao afrobeat, entre outros estilos, con Roi Vidal e Miguel Mosqueira alternándose nas voces principais.
En decembro de 2018 publicaron un dobre disco con 24 cancións divididas entre Ídolos adolescentes (2007-2011) e A vida dos animais (2012-2018). Incluíu cancións que apareceran en discos colectivos, homenaxes, directos, versións, ademais de catro temas inéditos. Tamén en decembro de 2018 anunciouse a marcha de Roi Vidal e Álvaro Trillo.[4]
En novembro de 2019 deuse a coñecer a nova formación do grupo,[5] co regreso de Álex Charlón e a incorporación de Cibrán Tenreiro (batería) e Julio Vilariño (sintetizadores).[6] Poucos días despois anunciouse a publicación dun novo EP no mes de decembro, A alma,[7] coa produción de Hevi (Malandrómeda).[8] A pandemia do COVID-19 lastrou a continuidade de concertos con esta formación. Cabe resaltar a gravación, xa no ano 2020, dun concerto no ciclo Galicia Emerxe que foi emitido nos medios públicos galegos.
A finais de 2021 anunciouse a marcha de Julio Vilariño e unha pausa na actividade para a composición de novos temas. O ano 2022 comezou coa publicación de "Por última vez", unha versión do tema de Ana Kiro para un disco compilatorio de clásicos musicais galegos a cargo de artistas contemporáneos.[9][10]
En abril de 2023 publicouse o oitavo disco de estudo da banda, seis anos despois do anterior.[11][12] Titulado Cabalgata, constou de 10 temas e contou coas colaboracións de Antía Ameixeiras, Hevi (produción) e David Silva (videoclips e deseño).[12]
Estilo
[editar | editar a fonte]![](http://upload.wikimedia.org/wikipedia/commons/thumb/d/de/29N_Marcha_da_Dignidade-_Yolanda_D%C3%ADaz-Ataque_Escampe-Praza_Publica.jpg/220px-29N_Marcha_da_Dignidade-_Yolanda_D%C3%ADaz-Ataque_Escampe-Praza_Publica.jpg)
Até 2011, Ataque Escampe emprega para o seu estilo a etiqueta "rock de serie B", pola precariedade de medios na que comezaron e tamén por certo antivirtuosismo. O "rock de serie B" ten como alicerce o rock acústico e o folk rock estadounidense, e Neil Young, Wilco, Violent Femmes ou Micah P. Hinson son algunhas das súas referencias desta época, xunto a grupos de pop e rock estatal coma Los Enemigos ou Antònia Font e formacións galegas coma Os Resentidos ou a Psicofónica de Conxo.
A partir de 2011, o grupo abandona esta etiqueta, paralelamente ao son afeccionado dos seus inicios. Ao mesmo tempo, orienta a súa sonoridade cara a un pop ecléctico con influencias puntuais de estilos máis variados: soul, disco, ritmos latinos, funk, rap, dub ou krautrock.
As letras caracterízanse pola súa estreita relación coa literatura e o cinema. Nelas tamén están presentes o pouso xeracional, a vontade de experimentación lírica, o pouso agridoce ou a política.
Discografía
[editar | editar a fonte]- Ed Wood e a invasión dos paraugas asasinos (A Regueifa Plataforma, 2007).
- Galicia es una mierda (A Regueifa Plataforma e A Regueifa Discos, 2008).
- Galicia es una fiesta (A Regueifa Plataforma e A Regueifa Discos, 2009). EP.
- A grande evasión (A Regueifa Plataforma e A Regueifa Discos, 2009).
- Violentos anos dez (A Regueifa Plataforma e A Regueifa Discos, 2011).
- Noites de agosto con Ataque Escampe (Discos da Máquina, 2012). EP.
- O disco vermello (Discos da Máquina, 2014).
- Primeiros bicos (2017).
- Ídolos adolescentes (2007-2011) e A vida dos animais (2012-2018) (disco duplo, 2018). Recompilatorio.
- A alma (2019). EP.
- Cabalgata (2023).
Presenza en compilatorios
[editar | editar a fonte]- Manifesto Dobarrista (A Regueifa Plataforma, Falcatruada, Lonxa cultural, 2007): "Para che falar de amor"
- Esccolma (Caramuxo, 2007): "Móbel-bar"
- Aturuxa (C.S. Aturuxo, 2007): "Ana e o caracol"
- GZ POP! (Xunta de Galicia, 2008): "I'm not your man"
- A música que facemos (Cultur.gal, 2008): "Galicia es una mierda"
- Vozes Novas (Novas da Galiza e Komunikando, 2009): "A abordaxe final"
- Once máis 15 (Edicións do Cumio, 2009): "Ningún lugar seguro (GalegoZ Remix)"
- Come on, Pelegrín (Estrella Galicia e Pista Oculta, 2010): "No estómago dun crocodilo"
- A tribo toda baila. 30 anos de música feliz cos Resentidos (GASA, 2012): "Música feliz"
- Os Bolechas fan unha banda (Bolanda, 2013): "After hours"
- Monstros da Máquina vol. I (Discos da Máquina, 2014): "Evita" (con Sub Rosa)
Notas
[editar | editar a fonte]- ↑ "DEZ VIOLENTOS ANOS XUNTAS: Crónica do desastre (V)", post no blog de Ataque Escampe, 13 de abril de 2012.
- ↑ Lugo, El Progreso de (2011-03-30). "Ataque Escampe presentan sus 'Violentos anos dez'". El Progreso de Lugo (en castelán). Consultado o 2022-02-21.
- ↑ Salgado, Daniel (2012-04-20). "Ataque Escampe celebra diez años de folk y soul “como si fuese un aniversario de boda”". El País (en castelán). ISSN 1134-6582. Consultado o 2022-02-21.
- ↑ Dani Salgado (31 de decembro de 2018). "A letra pequena de Ataque Escampe". Sermos Galiza. Arquivado dende o orixinal o 01 de xaneiro de 2019. Consultado o 31 de decembro de 2018.
- ↑ Diario, Nós. "Ataque Escampe pon fin a ano e medio de descanso e retorna co seu primeiro vocalista". Nós Diario. Consultado o 2022-02-21.
- ↑ "Presentámosvos a banda do comezo dos vinte". Facebook. 12 de novembro de 2019.
- ↑ "O 13 de decembro poderedes escoitar online A alma, o noso novo EP.". Facebook. 15 de novembro de 2019.
- ↑ "Ataque Escampe libera a alma". Nós Diario. 19 de decembro de 2019. Consultado o 23 de abril de 2023.
- ↑ "Ataque Escampe canta a Ana Kiro no adianto dun recompilatorio de versións de clásicos da canción galega". Praza Pública. 2022-01-14. Consultado o 2022-02-21.
- ↑ "Ataque Escampe: «Ana Kiro é en Galicia o que Rocío Jurado para España»". La Voz de Galicia (en castelán). 2022-01-21. Consultado o 2022-02-21.
- ↑ Xestoso, Manuel (18 de abril de 2023). "Ataque Escampe dialoga co pasado no seu novo traballo, 'Cabalgata'". Nós Diario. Consultado o 22 de abril de 2023.
- ↑ 12,0 12,1 "'Cabalgata', o novo traballo de Ataque Escampe, preséntase este martes 18 de abril nas principais plataformas dixitais". 17 de abril de 2023. Consultado o 22 de abril de 2023.
Véxase tamén
[editar | editar a fonte]Ligazóns externas
[editar | editar a fonte]![]() |
Wikimedia Commons ten máis contidos multimedia na categoría: Ataque Escampe |