Traveseiro
![](http://upload.wikimedia.org/wikipedia/commons/thumb/1/12/Lautrec_in_bed_1893.jpg/220px-Lautrec_in_bed_1893.jpg)
Un traveseiro[1], almofada, cabeceiro ou cabezal é unha especie coxín feito usualmente de pana, pluma, cotón, escuma, viscoelástico etc. que se utiliza á cabeceira da cama, servindo para descansar a cabeza mentres se dorme. O traveseiro ponse sobre o colchón, na parte superior da cama vestíndose co xogo desta. O seu obxecto é manter recta a columna vertebral enchendo o oco do pescozo para relaxar a caluga, evitar tensións musculares, diminuír o estrés acumulado durante o día e axudar a conseguir un soño tranquilo.
Etimoloxía
[editar | editar a fonte]O termo galego traveseiro (en portugués: travesseiro) ten orixe por ser un coxín que se atravesa de lado a lado da cama. O termo aparece xa no texto de Antonio López Ferreiro de 1895: O Castelo de Pambre, leenda do sigro XIV:
- ..Feito esto volveu-se pra a súa cámara, escondeu os panos furtados debaixo do seu traveseiro e no seu baiul e meteu-se na cama...[2]
O termo almofada provén do árabe andalusí مخدة mujadda, con adición do artigo determinado al-, isto es: المخدة al-mujadda, que vén do árabe estándar mijadda: coxín. A raíz desta verba é jadd (banda ou meixela), así que se relaciona semanticamente co feito de acougar a meixela ou descansar de costado. O termo almofada aparece en galego antigo xa no Inventario de los bienes de Lope González, pub. por Oviedo Arce en la C. D . G. H., p. 286:
- ...iten oyto cabeçaas, iten tres almofadas, iten dous colchoos...[3].
Óllese que o termo portugués almofada refírese a calquera tipo de coxín, reservándose o termo travesseiro para o traveseiro.
Historia
[editar | editar a fonte]A comezos foron usadas pola clase alta, e foron atopadas en tumbas do Antigo Exipto. A dificultade de tinturas sofisticados e técnicas de costura conduce ao desenvolvemento destas coma un xeito de arte, con modelos sumamente enfeitados orixinarios da China, que chegaron séculos despois á Europa Medieval. Coa Revolución industrial chegou a fabricación en serie de pezas téxtiles decoradas, que acabaron por se espallar. Os traveseiros tradicionais chineses son caixas feitas con materiais coma a pedra, a madeira, o metal ou a porcelana no canto de ser recheas de tea.[4]
Os traveseiros tradicionais galegos enchíanse de lá, palla ou follaco de millo.
Composición
[editar | editar a fonte]Un modelo estándar consta de tres pezas:
- Un material interior non mol que lle dá a súa característica consistencia.
- Unha funda interior cosida, que pode ser de cotón ou fibra.
- Unha funda exterior que, se leva gramalleira, pódese retirar para a lavadura.
A isto, adóitase engadir como parte da roupa de cama unha funda externa lavábel.
As medidas coinciden co largo habitual das camas, sendo as máis habituais as seguintes: 67 cm, 80 cm, 90 cm, 105 cm, 135 cm, 170 cm.
Tipos
[editar | editar a fonte]Polo material de fabricación do núcleo interior, pódense distinguir:
- De fibra, as máis habituais.
- De pluma. O recheo é de plumas de ave, xeralmente, de ganso.
- De látex.
- De Memory foam.
Pola súa forma pódense distinguir:
- Tradicional. O traveseiro tradicional é unha peza estreita e longa.
- Bolboreta cervical. Ten forma de bolboreta e semella estar indicada para persoas con doenzas cervicais.
- Cervical. Modelo curto con forma cóncava e resaltes na súa superficie que tamén parece destinarse a persoas con problemas cervicais.
Notas
[editar | editar a fonte]- ↑ Recollido pola Real Academia galega, e outras fontes: http://sli.uvigo.es/DdD/ddd_pescuda.php?pescuda=traveseiro&tipo_busca=lema
- ↑ Texto en Tesouro informatizado da Lingua galego da USC.
- ↑ Real Academia Galega (1913-1928): Diccionario gallego-castellano
- ↑ Almofadas de porcelana Arquivado 16 de marzo de 2006 en Wayback Machine. (en inglés).
Véxase tamén
[editar | editar a fonte]![]() |
Wikimedia Commons ten máis contidos multimedia na categoría: Traveseiro |