Louredo, Mos
San Salvador de Louredo é unha parroquia do concello de Mos. Segundo o IGE en 2014 tiña 1626 habitantes (813 homes e 813 mulleres) distribuídos en 11 entidades de poboación. Segundo o padrón municipal en 2004 tiña 1197 habitantes (605 mulleres e 592 homes), 162 máis ca en 1999.
| Louredo | |
|---|---|
 Igrexa de San Salvador de Louredo | |
| Concello | Mos[1] |
| Provincia | Pontevedra |
| Coordenadas | 42°13′32″N 8°35′33″O / 42.225459464082, -8.592378399344 |
| Poboación | 1.626 hab. (2014) |
| Entidades de poboación | 4[1] |
| [ editar datos en Wikidata ] | |
Xentilicio
editarO seu xentilicio é louriño[2].
Topónimo
editarO topónimo Louredo (do latín LAURETUM, de LAURUM máis o sufixo abundancial -ETUM) fai referencia a un lugar onde hai loureiros.
Xeografía
editarNos últimos anos, presenta un forte crecemento demográfico grazas en boa parte á urbanización de Santo Antoíño. A parroquia está atravesada pola estrada N-550 e pola liña de ferrocarril Redondela-Ourense. Cara ao sur da parroquia creouse a comezos do século XXI un polígono industrial.
Louredo é a parroquia de Mos con maior número de hectáreas de monte, aínda que eses terreos están sendo atacados constantemente por mor dos devastadores incendios forestais que asolan toda a zona. A pesar diso, a fauna e a flora destes montes é moi numerosa e lévanse a cabo actuacións para a recuperación da súa contorna.
Patrimonio
editarA igrexa parroquial é de orixe románica do século XII e retocada no XIII. Porén, sufriu importantes cambios estruturais a finais do século XVIII. Consérvanse canzorros nos muros laterais antecedendo ao beirado e á cornixa. Sobre a porta hai unha inscrición co texto ESTA OBRA HIZO A SU COSTA DON FRANCISCO CASTIÑEIRA. AÑO DE 1780. A torre foi construída en 1722, con base cadrada. No interior hai un escudo de armas que fai referencia á liñaxe dos Lanzos e Taboada, así como un sepulcro situado na Capela Maior. A igrexa sufriu un incendio o 10 de marzo de 1996, que destruíu o teito da nave central. En 1997 fíxose a rehabilitación[3].
No enreixado da igrexa hai un peto de ánimas, presidido pola Virxe do Carme[4]. Na casa reitoral, con planta en forma de L e muro con porta ameada coa data de 1666 no seu lintel, consérvanse os muros dunha capela do século XVI[5].
O pazo de Santo Antoíño ten orixe no século XIV, pero foi reconstruído no XVIII. Conta cunha capela do XVI.
A carón da igrexa consérvase unha ponte sobre o rego das Fragas, pola que discorría o camiño real de Tui a Santiago de Compostela.
Galería de imaxes
editar-
-
Peto de ánimas -
Notas
editar- ↑ 1,0 1,1 Decreto 219/1998, do 2 de xullo, polo que se aproba o nomenclátor correspondente ás entidades de poboación da provincia de Pontevedra.
- ↑ "Xentilicios_0.pdf" (PDF). p. 25. Consultado o 22 de xullo de 2021.
- ↑ Igrexa parroquial de San Salvador de Louredo na páxina web colaborativa Patrimonio Galego.
- ↑ Peto de Ánimas de San Salvador de Louredo na páxina web colaborativa Patrimonio Galego.
- ↑ Reitoral de San Salvador de Louredo na páxina web colaborativa Patrimonio Galego.
Lugares e parroquias
editarLugares de Louredo
editar| Lugares da parroquia de Louredo no concello de Mos (Pontevedra) | |
|---|---|
|
Arrufana | O Enxertado | O Pantaño | O Pombal |