V.I.P. (Amerikaanske telefyzjesearje)

V.I.P.
tillefyzjesearje
makkers
ûntwikkele troch	J.F. Lawton
útfierend    produsint	Pamela Anderson J.F. Lawton
tillefyzjestudio	Lawton Entertainment Columbia TriStar Television
spilers
haadrollen	Pamela Anderson Molly Culver Natalie Raitano Angelle Brooks Shaun Baker Dustin Nguyen Leah Lail
skaaimerken
sjenre	aksjekomeedzjesearje
seizoenen	4
jierren	1998 – 2002
tal ôfl.	88
spyltiid (ôfl.)	45-48 min.
lân/lannen	Feriene Steaten
taal	Ingelsk

V.I.P. (útspr.: [wi:ja:i'pi:], likernôch: "wii-aai-pii") wie in súksesfolle Amerikaanske Ingelsktalige tillefyzjesearje oer in bedriuw dat liifwachten ferhiert oan pommeranten dy't dêr ferlet fan hawwe. It wie in aksjekomeedzjesearje, mei yn 'e haadrollen Pamela Anderson, Molly Culver en Natalie Raitano. De searje, dy't produsearre waard troch J.F. Lawton, rûn fjouwer seizoenen rûn, fan 1998 oant 2002, en waard ek bûten de Feriene Steaten yn gâns oare lannen en territoaria útstjoerd.

Produksje

V.I.P. waard betocht troch de Amerikaansketillefyzjeprodusint J.F. Lawton, dy't de searje tegearre mei haadrolspylster Pamela Anderson produsearre foar de tillefyzjestudio's Lawton Entertainment en Columbia TriStar Television. De searje waard útbrocht yn syndikaasje en wie foar it earst op 'e (Amerikaanske) tillefyzje te sjen op 26 septimber 1998. Hy waard goed besjoen en rûn fjouwer folsleine tillefyzjeseizoenen, mei yn totaal 88 ôfleverings, elts mei in spyldoer fan 45 oant 48 minuten. Yn V.I.P. waard in miks fan aksje, komeedzje en oerdriuwing brûkt om 'e ferhalen yn byld te bringen. Dêrby hie Anderson yn 'e searje faak de gek mei har eigen imago sa't dat bûten de searje om yn 'e rabbersblêden bestie.

Utgongspunt fan 'e plot

Pamela Anderson, dy't de status fan sekssymboal berikt hie mei har fotoreportaazjes as neakenmodel yn 'e Playboy en har rol as C.J. Parker yn 'e populêre aksjesearje Baywatch, spile yn V.I.P. Vallery Irons, in frou dy't by fersin it libben fan in bekende persoan rêdt en dêrnei ynhierd wurdt as profesjonele liifwacht. Se rjochtet in eigen buro op dat mêd op, dat se V.I.P. neamd. Ornaris is dat yn it Ingelsk in ôfkoarting foar very important person(s), wat oerset wurde kin as "pommerant(en)". Yn dit gefal is dat in wurdboarterij dy't sawol ferwiist nei har klanten, as in ôfkoarting is foar Vallery Irons Protection.

Irons is fan doel om op 'e eftergrûn te bliuwen en inkeld te fungearjen as ferneamd kopstik, wylst se profesjonele liifwachten yn 'e tsjinst nimt om it eigentlik wurk te dwaan. Mar op 'e iene of oare wize rekket se oanhâldend by de aksje belutsen. Dêrby wurdt har gebrek oan 'e feardichheden dy't men fan in echte liifwacht ferwachtsje meie soe har tsjinstanners yn eltse ôflevering fataal. De oare leden fan har team binne in ferskaat oan lju mei ferskillende eftergrûnen, lykas in âld-lid fan 'e KGB, in âld-plysje, in kompjûterekspêr, in fjochtsporter en letter ek in stuntman.

Rolferdieling

haadrollen

• 
  Pamela Anderson
• 
  Molly Culver
• 
  Natalie Raitano (rj.)
• 
  Dustin Nguyen

personaazje	akteur/aktrise	opmerkings
Vallery Irons	Pamela Anderson	seizoen 1–4
Tasha Dexter (eks-spionne)	Molly Culver	seizoen 1–4
Nikki Franco (wapens- en eksplosive-ekspêr)	Natalie Raitano	seizoen 1–4
Maxine de la Cruz (bêste freondinne fan Vallery)	Angelle Brooks	seizoen 3–4; weromkearende rol yn seizoen 1–2
Quick Williams (bokser en fjochtsporter)	Shaun Baker	seizoen 1–4
Johnny Loh (karatemaster en stuntman)	Dustin Nguyen	seizoen 3–4; weromkearende rol yn seizoen 1–2
Kay Simmons (kompjûterekspêr)	Leah Lail	seizoen 1–4

Benammen yn it earste seizoen hiene yn V.I.P. in protte bekende persoanen in cameo. Dêrûnder wiene praatprogrammapresintators Jay Leno en Jerry Springer, showwrakselder Stone Cold Steve Austin en basketballer Charles Barkley. Aktrise Loni Anderson hie yn in ôflevering in gastrol as de mem fan Vallery Irons.

Seizoenen

seizoen	tal ôfl.	rûn fan	rûn oant	netwurk
1	22	26 septimber 1998	22 maaie 1999	syndikaasje
2	22	25 septimber 1999	20 maaie 2000
3	22	7 oktober 2000	19 maaie 2001
4	22	22 septimber 2001	18 maaie 2002

Publikaasje op dvd

V.I.P. waard op 14 maart 2006 troch Sony Pictures Home Entertainment útbrocht op dvd yn regio 1 (Noard-Amearika en guon oare gebieten; kin net ôfspile wurde yn Jeropa).

Untfangst en resultaat

Yn 1999 waard V.I.P. nominearre foar in Emmy Award yn 'e kategory treflike yntromuzyk. Yn 2002 waard de searje nominearre foar trije Emmys, wêrfan't er de priis foar treflike inkele-kameramontaazje wûn.

Keppelings om utens

• (in) De titelmuzyk fan V.I.P. op YouTube
• (in) Ynformaasje oer V.I.P. yn 'e Internet Movie Database

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.