Anton Heimreich

Anton Heimreich wörd di 5.3.1626 önj Trindermarsch (Söödoostdiilj foont üülj Nordströnj) tuläid, weer san taatje prääster wus (ouf 1639 aw Pelweerm) än weer'r wälj sin bjarnetid bit 1634 ferbroocht heet. Eefter sin schölj- studien- än räisetid (1640-52) laawed'r sunt 1652 as prääster aw Latj Moos wider uner Nordströnjer, wat jam iinjsen aw et "wüstes Moor" made önjt lönj ladenen ouerrest foont üülj ailönj boogseet hääwe. Et koon ai säid wårde, dåt huum önj Trindermarsch ouers snååked heet as heer. Aw arken fål heet Anton Heimreich en rucht Nordströnjer frasch snååked. Hi wus befraid ma Helene Finke än heet tumånst trii bjarne hädj. Heimreich heet e tweed Marcellusflut ("Grote Manndränke") beschraawen, hü dåt üülj Strönj unergingen as, dåt heet'r önj sin "Nordfresischen Chronik" 1666 beschraawen. E jarst wersion foon e Rungholtsooge as önj sin kroonik uk tu finen, weer Detlev von Liliencron sin ballade foon dachted heet. Uk di begrip "Blanker Hans" as sünonüm for e Nordsii as uk foon ham. Störwen as'r 1685 aw Latj Moos, di däi nau koon huum ai seede. Kånd wörden as'r as kroonikschriwer, önj sin kroonik san da ålste tüüchnise foont frasch tu finen. Et san hu dachte: Yn Miren=Söngh; Yn Een=Söngh; Hans Tadesens Hammeldiebstahl, wat önj sin kroonik oufpränted san.