Doro Pesch
C'l artìcul chè 'l è scrit in
Miranduléś |
![](http://upload.wikimedia.org/wikipedia/commons/thumb/4/43/Doro_Helmond2006_3.jpg/220px-Doro_Helmond2006_3.jpg)
Doro Pesch (Düsseldorf, 3 ad Śugn dal 1964, Dorothee 'l è 'l sò nóm véra) l'è na cantànta heavy metal tedésca ch'l'à cantâ prima in dal grup di Warlock (in fiṅ a 'l 1988) e pò in dal sò grup Doro.
Biugrafìa
L'infànsia
Fióla 'd un camiunìsta, che da pìcula al la purtàva sèg in di viàś ad lavór, quànd la gh'à séd'ś an la s mala ad tuberculóśi in di palmòṅ e la finìs in fin 'd vita, pasànd 'n an a 'l uśdàr, ma la scampa e la decìd ad métar sù un grup rock. Prima la fà sù un grup ciamâ Snakebite e pò, in dal 1983, i Warlock cun tant ad cuntràt discugràfic: par Doro la taca la sò caréra ad cantànta.
I an cun i Warlock
In di prim méś dal 1984 i Warlock i faṅ gnir fóra al lór prim disc, Burning The Witches (Dand fóg al strìi). 'L àlbum al s vèra cun òṅ di bràṅ più bèi, Signs of Satan (un tìtul ad mòda in chi an lè) e al và avànti a la stésa manéra, cun al rock rabî ad After the Bomb, Dark Fade, Homicide Rocker e Metal Race e la title-track stésa.
![](http://upload.wikimedia.org/wikipedia/commons/thumb/d/d0/Doro_Helmond2006.jpg/175px-Doro_Helmond2006.jpg)
In dal 1985 i pàsan a la cà discugràfica Phonogram e i faṅ gnir fóra Hellbound, un disc dimónd dur cun i braṅ Out Of Control, Earthshaker Rock, All night e Hellbound dégn ad nòta.
'L an dòp l'è la vòlta ad True as steel (Vér cum 'l asèri) e i Warlock i tóśan al vól: Mr.Gold, Speed of sound e Fight For Rock i èṅ di braṅ ch'i śbràgan incòsa!
Al grup al vèṅ ciamâ par sunàr al "Monsters of Rock" a Donington in Gran Bretàggna e Doro l'è la prima dóna dla stòria a muntàr sù a cal palc lè.
In dal 1987 a véd la luś al quàrt e ùltim àlbum di Warlock, al più bèl ad tut a dita ad mólt: Triumph and Agony (Triùnf e lantcór), rigistrâ a New York. Dèntar a cal lavór chè i s càtan di clàsic dal grup cuma All we are, I rule the ruins, East meets west, Für Immer (cantàda in tedésc, a vól dir Par sèmpar) e la catìva Touch of evil in dua Doro la canta in na manéra dimóndi rabìda e a par ch'la gh'àppia al diav'l adòs. Sèmpar in c'l an lè, i Warlock i vâṅ in tour insém a D.I.O. in Europa e cun i Megadeth in di Stat Unî.
In dal 1988 Doro Pesch la cambia la furmasiòṅ di Warlock (cun i nóṿ chitarìsta Jon Devin e baterìsta Bobby Rondinelli) e la taca a lauràr al nóṿ disc. Par di prubléma legài la gh'à da cambiàr al nóm dal grup (da Warlock a Doro) parchè i dirìt i éran dal vèć manager.
In dla lór caréra ad quàt'r an, Doro Pesch insém a i Warlock i aṅ muciâ sù quàtar disc, un live in VHS, Metal Racer, e dimóndi cuncèrt dal viṿ, òṅ anc cun i Judas Priest, al spetaculàr Fuel for Life Tour.
I an c'n i Doro
![](http://upload.wikimedia.org/wikipedia/commons/thumb/0/0e/Doro_Metalcamp07_01.jpg/310px-Doro_Metalcamp07_01.jpg)
In dal 1989 Doro la sa spòsta in di Stat Unî e la sfruta la prudusiòṅ rica dla Vertigo par dar vita a Force Majeure (un tìtul in francéś ch'al vól dir Fòrsa più granda), un bèl disc ch'al sòna cum al precedènt cun al clàsic Hard times, la cover parfèta ad A whiter shade of pale di Procol Harum (tut i du sìngui par MTV), al lènt ch'al tóś al cór Beyond the Trees, al rock da cuncèrt Save my soul e la rabìda World gone wild. Al disc al finìs cun un braṅ pìcul ch'al dura sól 36 secónd, Bis aufs blut (Fiṅ a sangvinàr), cantâ a capèla in dla sò lingua, in du la fà védar quant al pōl èsar muśicàl e bèl anc al tedésc.
In dal 1990 Doro la s fà prudùrar par Gene Simmons di Kiss e la regìstra al disc Doro cun di sunadōr tut nóṿ ad paca, in mèś a i quài a gh'è anc Tommy Thayer che soquànt an dòp al turà 'l pòst 'd Ace Frehley in di Kiss.
Al prim sìngul Unholy love, ch'al s vèra c'n un gir ad bas, al gh'à un vìddeo girâ a 'l Yosemite Park in di Stat Unî, al secónd sìngul 'l è 'n lènt, Rare diamond. Faghénd al ròbi curti a s pōl dir ch'l è 'n pas indrē in cunfrònt a i sò lavōr 'd prima. I mèritan 'd èsar tgnû a mènt i braṅ Something wicked this way comes e la cover di Kiss Only You, cantàda a la sò manéra, trata da 'l àlbum dasfurtunâ Music from the Elder.
![](http://upload.wikimedia.org/wikipedia/commons/thumb/7/7b/Doro_Pesch_%E2%80%93_Wacken_Open_Air_2014_02.jpg/260px-Doro_Pesch_%E2%80%93_Wacken_Open_Air_2014_02.jpg)
In dal 1991 Doro la fà vgnir fóra na racòlta di sò braṅ più famóś, suo e di Warlock, fra i quài i s càtan Für Immer e na East Meets West sunàda da 'l viṿ.
Sèmpar in dal 1991 a vèṅ fóra al tèrs àlbum di Doro, rigistrâ a Nashville, True At Heart (Vér al cór), un disc dimóndi persunàl, difarènt ad quéi vèć di Warlock, cun di lènt chi dascóran ad lē e di sò sintimènt, cuma Even Angels Cry, Fall For Me Again, I'll Make It on My Own, I Know You By Heart. I n màncan briśa i braṅ più dur cuma Cool Love, You Gonna Break My Heart e Hear Me. Dascórs a part par la cansòṅ The Fortuneteller in dua Doro la rècita un tèst in ingléś (ma sèmpar cun al sò marcâ acènt tedésc) sénsa cantàr-al, a part al riturnél ch'al prénd dimóndi.
![](http://upload.wikimedia.org/wikipedia/commons/thumb/1/1c/Doro_pesch_hh_02.jpg/215px-Doro_pesch_hh_02.jpg)
Dòp avér pasâ tut al 1992 a far di cuncèrt sunànd in Germàgna, in dal 1993 la tóś sèg Johnny Dee a la baterìa e i chitarìsta Joe Taylor (ex ad Lita Ford) e Jimmy di Lella e la fà gnir fóra Angels Never Die (I Àngil i n móran mai), un disć da i stìi misć cun di braṅ rock dur (Eye on you), soquànt melòdic (Bad blood) e di lènt (So alone together, Don't go e Enough for you). 'L ùltim braṅ, sunâ al piaṅ, 'l è na bèla cansòṅ in tedésc Alles ist gut (Tut 'l è bèṅ).
In dal 1995 a vèṅ fat gnir fóra 'l ùltim disc par la Polygram, Machine II Machine (Da màchina a màchina), un disc piutòst elètric e cun di campiunamènt ma minga mâl, pîṅ ad tèst sensuài. Tie me up, i sìngui Ceremony e In Freiheit Stirbt Mein Herz in tedésc (a vól dir Al mè cór al mór lìbar), al lènt Desperately e Like Whiskey Straight i èṅ i braṅ più bèi.
Subìt dòp a vèṅ fóra na versiòṅ dal disc cun i braṅ rimixâ, Machine II Machine - Electric Club Mixes. A la fiṅ d'l an a partìs al tour e Doro la cata anc al tèmp ad far na pìcula part in un film p'r la televiśiòṅ tedésca Verbotene Liebe (Amór pruibî).
In di an sucèsiṿ, Doro la s tóś na pàusa e acsè i vénan fóra dal racòlti par masàr al tèmp. La prima a védar la luś 'l è A Whiter Shade of Pale e pò 'l è al tùran 'd Earthshaker Rock, ad Best of Doro e ad The Ballads.
Finalmènt in dal Maǵ dal 1998 a s pōl catàr in di negòsi un disc nóṿ dla front-woman ad Dusseldorf: Love Me In Black (Ama-m in négar). La sò cà discugràfica, la Warner Bros, la gh dmanda ad tinśar-s i cavìi ad négar, par far na surpréśa a i fans, ma lē la diś ad nò. 'L àlbum al gh'à 'l apòǵ di sò sustenidór e anc dal bèli recensiòṅ par via ad canti dégni ad nòta cuma Do you like it?, Love me In black, Pain, Terrorvision, Poison arrow e Barracuda.
![](http://upload.wikimedia.org/wikipedia/commons/thumb/7/7c/Doro_Helmond2006_2.jpg/205px-Doro_Helmond2006_2.jpg)
Par védar 'n àt'r àlbum a gh'è da spetàr du an: Calling The Wild (Ciamànd al salvàdag) a véd la luś in dal Setémbar dal 2000 in du versiòṅ, una européa e una americàna. Al disc 'l è dignitóś, specialmènt in di braṅ Kiss me like a cobra, in dla ballad Give me a reason, in dal cover Love Me Forever (di Motorhead e che chè la la canta insém a Lemmy Kilmister stés) e White wedding ad Billy Idol (dura asè ch'la par gnuda fóra da la péna 'd H.I.M.), la cansòṅ pîna ad meludìa Who you love e Burn it up.
In d'l Agóst dal 2002 'l è al tùran ad Fight (Cumbàt), un disc rigistrâ praticamènt dal viṿ in un studi dla Pennsylvania e a s sènt fin da 'l inìsi cun la title-track, cun Rock before we bleed o cun Always live to win, ch'i gh'àṅ quèl ad gréś. Pîna ad sentimènt l'è Undying mèntar in d'l àlbum Doro la fà anc un duét cun Peter Steele di Type O Negative in dla canta Descent.
Ad chi du disc chè a s pōl catàr na versiòṅ in digipack cun di braṅ da piò.
Al 13 ad Dicémbar dal 2003, dòp di méś in gir par sunàr, Doro la tórna a cà sua a Dusseldorf par festegiàr al ventéśum aniversàri dla sò caréra e la ciàma di òspit speciài quài Lemmy e Mickey Dee di Motorhead, UDO, Blaze Bayley (ex cantànt di Iron Maiden) e soquànt di mémbar vèć di Warlock. Al cuncèrt ch'a gh vèṅ fóra 'l è un sucesòṅ.
![](http://upload.wikimedia.org/wikipedia/commons/thumb/b/b1/Doro_pesch_hh_03.jpg/180px-Doro_pesch_hh_03.jpg)
Par védar un cuncèrt ad cal perìud lè, a s pōl tór al DVD muśicàl dal 2003 Für Immer pîṅ ad materiàl interesànt, cun un live rigistrâ in na spilónca a Balve durànt al Fight tour e tut i sò viddèoclip muciâ sù.
In dal 2004 la rigistra un disc dal viṿ, Classic diamonds cun i sò pès più famóś insém a l'urchèstra ad Bochum.
In dal 2006 la fà gnir fóra al disc Warrior soul (Anma da guèra) e Doro la fà védar ch'l è incóra bòna ad far di disc dur cuma na vòlta, basta scultàr i braṅ You're my family dedicàda a i sò sustenidór, 'l hard rock 'd Haunted heart e ad Thunderspell, al lènt In liebe und freundschaft e la rabìda Ungebrochen. Dòp soquànt an, la tórna anc in Itâglia par sunàr a Milàn, Firänz e Trevìś.
Fear no evil 'l è al tìtul dal disc dal 2009, ùndas braṅ in dla sò tradisiòṅ. Al disc al s vèra cun la canta puténta Night of the Warlock ch'la fà gnir vója ad tàcar subìt 'n headbanging sénsa vargnoggna e pò al và avànti cun Running from the Devil in dua Doro la fà gnir fóra la sò vóś catìva di an Utànta. Celebrate e 25 Years i vólan far un tribùt a la sò lunga caréra mèntar a n manca minga al lènt, It kills me.
![](http://upload.wikimedia.org/wikipedia/commons/thumb/c/c2/Doro.jpg/290px-Doro.jpg)
In dal 2010 a vèṅ fóra 25 Years in Rock, un cufanét ad 2 DVD e 1 CD cun rigistrâ insìma 'l cuncèrt selebratìṿ di vint-sinc an dla sò caréra, tgnû al 13 ad Dicémbar dal 2008 a Düsseldorf davànti a òt-mila sustenidōr scatenâ. La Doro la canta da Dio Big City Nights e Rock You Like an Hurricane insém a Klaus Meine e a Rudolph Schenker di Scorpions. E pò i mòntan sù i Warlock dal 1986 par 'n eśibisiòṅ ch'la n s pōl minga daśmindgàr.
In dal 2012 la cantànta tedésca la dà a la luś Raise Your Fist al sò 12ś'm àlbum in studi.
Discugrafìa
c'n i Warlock
- 1984 - Burning the Witches
- 1985 - Hellbound
- 1985 - You Hurt My Soul (EP)
- 1986 - True As Steel
- 1987 - Triumph And Agony
da par lē
- 1989 - Force Majeure
- 1990 - Doro
- 1991 - Rare Diamonds (Racòlta)
- 1991 - True At Heart
- 1993 - Angels Never Diee
- 1992 - Doro Live (dal Viṿ)
- 1995 - Machine II Machine
- 1998 - Love Me In Black
- 1998 - The Ballads (Racòlta)
- 1998 - Best of Doro (Racòlta)
- 2000 - Calling The Wild
- 2002 - Fight
- 2004 - Classic Diamonds (dal Viṿ cun l'urchèstra ad Bochum)
- 2005 - In Liebe und Freundschaft (EP)
- 2006 - Warrior Soul
- 2007 - B-Sides & Rarities (Racòlta)
- 2009 - Fear No Evil
- 2010 - 25 Years in Rock (dal Viṿ)
- 2012 - Raise Your Fist
Duét
- 2001: Doro Pesch feat. Lemmy – "Love Me Forever" in Calling the Wild
- 2001: Doro Pesch feat. Lemmy – "Alone Again" in Calling the Wild
- 2001: Holy Moses feat. Doro Pesch – "Too Drunk To Fuck" (Dead Kennedys cover)
- 2002: Doro Pesch feat. Peter Steele – "Descent" in Fight
- 2002: Dirk Bach feat. Doro Pesch – "Gimme! Gimme! Gimme! (A Man After Midnight)" (ABBA cover)
- 2002: Udo Dirkschneider feat. Doro Pesch – "Dancing with an Angel" (in Man and Machine)
- 2003: Ministry feat. Jørn Lande Vs. Doro Pesch – "All We Are"
- 2004: Twisted Sister feat. Doro Pesch – "White Christmas" (in A Twisted Christmas)
- 2004: Doro Pesch feat. Blaze Bayley – "Fear of the Dark" (Iron Maiden cover)
- 2007: After Forever feat. Doro Pesch – "Who I Am" (in After Forever)
- 2007: D:Projekt feat. Doro Pesch – "Cold Prestige"
- 2007: Doro Pesch feat. Marc Storace & Luke Gasser – "On My own"
- 2008: Sabina Classen feat. Doro Pesch – "All We Are"
- 2008: Klaus Meine feat. Doro Pesch – "Big City Nights" (Scorpions cover)
- 2008: Tarja Turunen feat. Doro Pesch – "The Seer"
- 2008: Udo Dirkschneider feat. Doro Pesch – "East Meet West"
- 2008: Doro Pesch feat. Kiss in Time – "All We Are"
- 2008: Scorpions feat. Doro Pesch- "Rock You Like a Hurricane" (Scorpions cover)
- 2008: Doro Pesch feat. Biff Byford – "Celebrate"
- 2008: Doro Pesch feat. Angela Gossow,Sabina Classen, Floor Jansen, Liv Kristine, Girlschool – "Celebrate"
- 2009: Saxon feat. Doro Pesch – "All We Are"
- 2009: Saxon feat. Doro Pesch – "747 Strangers in the Night"
- 2009: Saltatio Mortis feat. Doro Pesch – "Salomé"
- 2009: Doro Pesch feat. Tarja Turunen – "Walking with the Angels"
- 2009: Skyline feat. Doro Pesch – "Wacken Anthem"
- 2009: Saxon feat. Doro Pesch – "You've Got Another Thing Comin'" (Judas Priest cover)