Treveur (sant)

Ur pennad Treveur zo ivez.

Treveur a oa ur priñs, hervez ar vojenn, a oa mab da santez Trifin (pe Trifina), merc’h kont Gwened, ha da Gonveur ( pe Conomor), kont Domnonea, er VI^vet kantved. Hemañ, war zigarez oa bet diouganet dezhañ e vije bet lazhet gant e vab, a lazhas e wreg hag a glaskas lazhañ e vab ivez. Gant sant Gweltaz e vije bet saveteet Treveur, a voe badezet gant ar sant ha desavet gantañ en e vanati e Rewiz. Un devezh en em gavas e dad gant ar bugel ha troc’hañ a reas dezhañ e benn. Abalamour da se eo bet lakaet da verzher ha diskouezet e vez alies e stumm ur paotr yaouank o tougen e benn. Enoret e vez sant Treveur e meur a lec’h e Breizh : ilizoù zo war e anv e Karaez, e Kerglof hag e Kamlez, ha chapelioù e meur a gumun all, evel ar Gelveneg, Kledenn-ar-C'hab, Plougastell, Gwerliskin, Sant-Trifin, Bubri, Langedig, ar Sent.

Anv-badez

D’an 8 a viz Du emañ gouel sant Treveur. Pedet e vez ouzh ar boan benn. Dont a rafe e anv eus trec'h ha meur. Ar stumm Tremeur a gaver alies er skridoù gallek.

Er yezhoù all

e kembraeg: Trefor
e galleg: Tremeur
e saozneg: Trevor

Levrlennadur

Roger Gargadenneg, Contes du Cap Sizun, Maisonneuve, 1977 (la légende de saint They et de saint Tremeur, p. 191)
Bernard Tanguy, Le culte de saint Gildas, sainte Trifine et saint Trémeur, Mémoires de la société d'histoire et d'archéologie de Bretagne, Tome LXXXIII, 2005

Liammoù diavaez

Istor sant Treveur (e galleg)
Istor sant Treveur, santez Trifin ha Konveur (e galleg)