Grupu de la tabla periódica

Un grupu de la tabla periódica ye una columna de la tabla periódica de los elementos. Hai 18 grupos na tabla periódica estándar. Esisten 10 grupos curtios y ocho llargos. Nun ye coincidencia que bien d'estos grupos correspuendan a conocíes families d'elementos químicos: la tabla periódica ideóse pa ordenar estes families d'una forma integrada y fácil de ver.

Grupu de la tabla periódica
serie química

La esplicación moderna del ordenamientu na tabla periódica ye que los elementos d'un grupu tienen configuraciones electróniques asemeyaes nos niveles d'enerxía más esteriores; y como les más de les propiedaes químiques dependen fondamente de les interacciones de los electrones que tán allugaos nos niveles más esternos, esto fai que los elementos d'un mesmu grupu tengan propiedaes físiques y químiques paecíes.

Anguaño la forma de numberar los 18 grupos ye emplegando'l sistema recomendáu pola IUPAC (International Union of Pure and Applied Chemistry) nel 1985, que consiste n'utilizar númberos árabes. D'esta miente, la primer columna ye'l grupu 1, la segunda'l grupu 2, y asina hasta la decimoctava que correspuende al grupu 18.

Enantes de la forma de la IUPAC esistíen dos maneres d'anomar los grupos: un sistema européu y otru norteamericanu, dambos cada vegada más en desavezu. Éstes empleguen númberos romanos y lletres. Nel sistema européu primero ponse'l númberu romanu y depués una A si l'elementu ta a manzorga o una B si ta a mandrecha. Nel norteamericanu faise lo mesmo pero l'A ponse cuando ye un elementu representativu (grupos 1, 2 y 13 a 18) y una B nel restu.

Darréu llístense los grupos (ente paréntesis los antiguos sistemes: européu y norteamericanu por esi orde):

• Grupu 1 (IA,IA): alcalinos
• Grupu 2 (IIA,IIA): alcalinotérreos
• Grupu 3 (IIIA,IIIB)
• Grupu 4 (IVA,IVAB)
• Grupu 5 (VA,VB)
• Grupu 6 (VIA,VIB)
• Grupu 7 (VIIA,VIIB)
• Grupu 8 (VIIIA,VIIIB)
• Grupu 9 (VIIIA,VIIIB)
• Grupu 10 (VIIIA,VIIIB)
• Grupu 11 (IB,IB): metales d'alcuñu (nome non recomendáu pola IUPAC)
• Grupu 12 (IIB,IIB)
• Grupu 13 (IIIB,IIIA): grupu del boru
• Grupu 14 (IVB,IVA): grupu del carbonu
• Grupu 15 (VB,VA): grupu del nitróxenu
• Grupu 16 (VIB,VIA): grupu del oxíxenu
• Grupu 17 (VIIB,VIIA): halóxenos
• Grupu 18 (VIIIB,VIIIA): gases nobles

Enllaces esternos

• Datos: Q83306