Ayuda:Cómo pues collaborar

Fai'l to primer artículu en namás que trés pasos

¿Cómo crear un artículu que nun esiste?

Tienes delles formes. La percenciella ye introducir el nome l'artículu (como quies qu'apaeza entituláu, colos sos acentos y mayúscules) nel buscador y calcar el botón Dir. Si nun ta yá na Wikipedia, apaecerá un enllaz encarnáu col testu esti enllaz. Síguilu y podrás entamar a escribir.

¿Cómo-y doi forma al testu?

Los testos en negrina, los títulos de cabecera, les cursives... faense col códigu previstu pa caún d'esos estilos. Lo más fácil ye emplegar el menú qu'apaez enriba la caxa au escribes. Esi menú permítete tamién inxertar semeyes, enllaces a webs esternes o a artículos de la Wikipedia, o separtar el testu con llinies horizontales. Pero lo meyor ye qu'entames a escribir el códigu darréu. Asina, la negrina faese zarrando'l testu a destacar ente trés apóstrofos. La cursiva consíguese con dos apóstrofos, y les cabeceres con grupos de dos o trés signos =.

'''Esti testu saldrá en negrina'''
''Esti en cursiva''
==Esti ye un títulín pergrande==
===Y esti ye un titulín subordináu al anterior===
====Y esti subordináu al anterior, en dientru del anterior==== 

Pa separtar párrafos, nun val con calcar na tecla "enter" una vegada. Ties que da-y dos. Y si quies facer testu en sangría has d'entamar la frase con dos puntos (:), (::) ó (:::).

:Esta llinia ta desplazada.
::Esta talo más.
:::¿Quién sabe au pue llegar? :-)>

¿Cómo faigo los enllaces?

El códigu pa facer enllaces va ser el que más vayas emplegar y vas averate a elli de secute. Un enllaz a un artículu esistente na Wikipedia faise zarrando con dos corchete el testu col títulu esautu del artículu. Si quies facer l'enllace pero el títulu nun cuadra nel testu pues facelo. Por exemplu, si vas escribir que daquién ye estauxunidense, y quies enllaciar el xentiliciu col artículu sobro los Estaos Xuníos, ties de facelu asina:

[[Estaos Xuníos|norteamericanu]]. Sicasí, nel testu apaecerá namás el xentiliciu, pero al calcar sobre él col ratón, el llector dirá al artículu sobro'l país.

El procedimientu ye'l mesmu pa un enllaz esternu, pero zarrando la direición web y el testu esplicativu que saldrá destacáu ente corchetes simples.

Asina: [http://ast.wikipedia.org Wikipedia n'asturianu]

Y yá ta. En cuantes que lo tengas too fecho, namás te queda calcar el botonín de Grabar páxina. Si nun tas seguru de lo bien que tea escritu, pues echa-y enantes un güeyu calcando en Previsualizar.

Igües nun artículu

Iguar un artículu ye entá más fácil. Namás tienes que lu buscar, y calcar na pestaña d'igües (editar, na parte superior de la pantalla). Entós apaecerá la caxa d'igües au pues modificar lo que tea mal o ampliar con nueva información.

Recuerda que tienes que respetar les polítiques de Wikipedia en cuantes al Puntu de Vista Neutral, usu de material propio o con llicencia llibre, (ensin copyright) y que si te da por facer tochaes vas ser bloqueáu por un alministrador ;)

Delles cuestiones d'interés

Na Wikipedia ye perimportante la categorización de los artículos. Una vez qu'acabes d'escribir el to artículu, pues busca-y la estaya temática más afayadiza. Si nun la atopes, creesla. Ye percenciello. Namás tienes qu'escribir el siguiente códigu al final del to testu.

[[Categoría:la que seya]]

Si nun ta creada, apaecerá'l nome de la categoría encarnáu. Síguilo, y na caxa testu qu'apaez escribe darréu el códigu pa una categoría superios que yá exista. Por exemplu:

[[Categoría:Colombofilia]]

Suponiendo que la estaya de colombofilia nun existe, sigui l'enllaz, que te llevará a la caxa d'igües de la nueva categoría que creasti, y asóciala a una, o delles, categoríes superiores:

[[Categoría:Aficiones]]
[[Categoría:Palomba]]

Caxigalines útiles

• Nomes.

El problema frecuente ye'l del nome del artículu. Les dubies alrodiu d'esti tema puen discutise na estaya específica del chigre. Sicasí, en bien de casos pues atopar dellos nomes pa un mesmo artículu. Asina, la referencia na Wikipedia a Diana Spencer bien pudiera ser Lady Di. La solución ye redireccionar esta segunda opción a la primera, de mou que quien introduz el nome de Lady Di nel buscador, dirá darréu al artículu de Diana Spencer. Les redirecciones son perfáciles de facer. Namás ties que crear l'artículu pal nuevu títulu y escribir na caxa d'igües el siguiente códigu (y namás el siguiente códigu).

#REDIRECT:[[lo que seya]]
Siguiendo l'exemplu, nel nuevu artículu entituláu Lady Di escribiremos:
#REDIRECT:[[Diana Spencer]]

Llueu calques en Guardar páxina y yá ta.