Betula

Betula
Betula pendula
Clasificación scientifica
Dominio: Eukaryota Reino: Plantae División: Magnoliophyta Clase: Magnoliopsida Orden: Fagales Familia: Betulaceae Chenero: Betula

Os abetullos (d'o latín «abetūlla») u abetoches/as (posiblement, con a mesma etimolochía) son un chenero d'árbols de fuella caduca en a familia Betulaceae, conoixitos scientificament como Betula. O nombre latín «betūlla» u «abetūlla» pareix que demana d'una radiz celtica «betu», que ya gosaba significar abetullo en tiempos prerromans.

Os abetullos fan fuellas simples, con una forma caracteristicament romboidal, d'entre 3 e 6 cm de lonchitut per alto u baixo 2/3 d'amplo, con variacions per a especie. A crosta ye caracteristicament clara, grisa blanquinyosa. As flors, como en totas as Betulaceae, hi brostan fendo amentos masculins o femenins diferents, anque se troban totz en o mesmo árbol. Estes árbols gosan creixer dica fer d'entre 10 e 30 metros d'altaria.

As especies de Betula se troban per tot l'hemisferio norte, en Europa son omnipresents en os climas menimament humidos (fendo albarosas só que en as zonas de montanya en l'aria mediterrania) anque en Rusia y Escandinavia gosan formar grans extensions selvosas. En Nordamerica y Asia tamién son muit freqüents, pero en o norte d'Africa, per estar tan xuco lo clima suyo, tansament se i troban qualcuns. En os Pireneus espanyols, as albarosas més grans se troban en a Ribagorza y lo Pallars.

O nombre vernaclo «abetoch» pareix que ye exclusivo d'a Chacetania, decumentable seguntes R. Vidaller en as localidatz d'Echo, Chasa y Aragüés de lo Puerto. En a vecina val d'Ansó se i conoix tamién a forma femenina «abetocha». A forma «albar» que ye como se siente decir en a més gran parte de puestos per l'Alto Aragón oriental no fa referencia exclusiva a las especies Betula, sino que s'aplica a totz os árbols (encluitos barrazeras, albernices, tremoletas, poplos, ecetra) que manifiestan qualques caracteristicas fisicas en común, como de tener a crosta blanca (en latín, «alba») u de creixer en puestos humidos.

Enrastres externos

• Wikispecies tiene un articlo sobre Betula.
• Se veigan as imáchens de Commons sobre abetullos.