Potrecón

Ta atros usos d'o termin se veiga Seta (desambigación)

Potrecón, cuerpo fructifero de qualques fongos. En a imachen, Boletus edulis.

Os potrecons (de «putrir»), setas, buletz u camparols son os cuerpos fructiferos de bellas especies de fongos. Solen creixer en puestos pocins, debaixo d'os árbols pero tamién en belaltros puestos a on que no i haiga guaire luz y a humedat siga considerable. Bellas especies d'ixes fongos os fan comestibles, altras os tienen verenosos, y encara prou bi n'ha que pueden causar efectos psicoactivos.

Anque no son cautivatos en garra huerta, os potrecons se clasifican a dintro d'as hortalizas dende lo punto d'enviesta d'o suyo uso nutricional. En son eixemplos comestibles o robellón u mizclo (Lactarius deliciosus), o sampinyón (Agaricus spp.), o muixardón (Calocybe gambosa), as muixardinas (Marasmius spp.) u cualques especies de cocomas (chenero Lepiota).

As diferents denominacions ta istes cuerpos fructiferos tienen orichens diferents, y se sienten á sobén en comarcas u redoladas que no coinciden. «Bulet» (d'o latín «boletus») pareix que ye una denominación conoixida en as Cinco Villas, en o extrimo occidental d'Aragón. A parola «camparol» puede dimanar d'o pareixido d'entre a corona y os chambreros de palla que enantes s'emplegaba ta as fayenas de campo («camparol», en aragonés, ye a presona que treballa en o campo), y «potrecón», que se diz en o Sobrarbe, pareix que fa clara referencia á la putrefacción, que en en materials como a madera bellas vegadas s'acompania con l'aparición d'istes organismos.

Se veiga tamién

• Hortaliza
• Fruita
• Nutrición
• Fongo