Trading Places
Trading Places (títol orichinal en anglés, en aragonés Parquet de valors, enguerada en Aragón con o títol en castellano d'Entre pillos anda el juego, en aragonés Entre archols se fa lo chuego) ye una cinta de cine estausunidense de cine de comedia de l'anyo 1983 dirichida por John Landis seguntes un guión orichinal de Timothy Harris y Herschel Weingrod, con una banda sonora orichinal d'Elmer Bernstein, una dirección de fotografía de Robert Paynter y una producción cinematografica d'Aaron Russo ta las productoras Paramount Pictures y Cinema Group Ventures. Fn parte de l'elenco d'actors d'a cinta, en os suyos papels principals, Dan Aykroyd, Eddie Murphy, Ralph Bellamy, Don Ameche, Denholm Elliott, Jamie Lee Curtis, Kristin Holby y Paul Gleason.
Randolph y Mortimer Duke son dos chirmans bien cabaleros, propietarios d'una interpresa adedicada a lo corretache de materias primas de Philadelphia. En a suya interpresa i treballa Louis Winthorpe III, d'una antiga y distinguida familia, como director cheneral, estando amás o novio d'una sobrina nieta d'os dos chirmans, Penelope Witherspoon. Por a redolada circula tamién Billy Ray Valentine, un negro adedicau a chicoz emplumes, y cuan troba a Winthorpe, iste creye que l'ha robau , lo denuncia y lo detiene la Policía. Alavez os dos chirmans fan entre éls, como gosan fer siempre, una apuesta en cambiando las vidas d'xas dos personas completament oposadas en a hierarchía social: fan que Clarence Beeks, un d'os suyos emplegaus, acuse a Winthorpe de ladrón y narcotraficant y dimpués li dan comiat d'o treballo; a la vegada, os chirmans pagan a fianza de Valentine ta que marcha d'a garchola y li ufren a casa y lo treballo que dica l'inte teneba Winthorpe. Iste zaguero nomás troba que l'aduya d'una prostituta, Ophelia, qui l'aduya a cambio d'a promesa d'una recompensa economica cuan recupere la suya vida, y prencipia a investigar qué puet haber escaiciu. Simultaniament, Valentine descubre que en aplicar as suyas conoixencias d'a vida en as carreras a lo negocio, se converte en un exitoso "broker". Pero bien luego los dos chirmans saldan a suya apuesta y ya no veyen necesario conservar a Valentine, pero tampoco creyen que lis intrese recuperar a Winthorpe; lo problema ye que Valentine los ha escuitau, y decide buscar a Winthorpe ta que toz dos, chuntos, consigan que l'uno recupere la suya vida y que l'atro la mantenga y amás fer fuera d'o negocio d'as materias primas a los dos chirmans. En ixa labor troban l'aduya no nomás d'Ophelia so que tamién de Coleman, o mozo mayor d'a cada a on i viviba Winthorpe y a on agora i vive Valentine. Bien luego descubren que los dos chirmans Duke fundamentan una parte important d'o suyo exito en o soborno d'un funcionario publico d'o Departamento d'Agricultura d'os Estaus Unius que transporta información sobre l'estau d'as collitas, y preparan o suyo plan, emplegando-ne los cabidons de Coleman y Ophelia ta financiar a suya venganza.
A cinta s'ambienta en a suya epoca actual (1983) en as ciudaz de Philadelphia en Pennsilvania y de Nueva York en Nueva York, y las suyas escenas se filmoron en Philadelphia (Pennsilvania), en Newark (Nueva Jersey) y en Nueva York (Nueva York) en os Estaus Unius y en Saint Croix (Islas Vírchens d'os Estaus Unius).[2]
Se tracta d'una cinta que ha recibiu cuantos premios y nominacions, entra los cuals cal destacar una nominacion a los Premios Oscar en a suya 56ena edición (Millor Banda Sonora Orichinal); dos Premios BAFTA en a suya 37ena edición (Millor Actor Segundario y Millor Actriz Segundaria), amás d'una nominacion (Millor Guión Orichinal); y dos nominacions a los Premios Globos d'Oro en a suya 41ena edición (Millor Cinta de Musical u Comedia y Millor Actor de Musical u Comedia).
Actor | Papel | Notas |
---|---|---|
' |