Nueva Anglaterra

	Nueva Anglaterra; New England
	Rechión d'Estaus Unius
Bandera	Escudo
Entidat; • País	Rechión; Estaus Unius
Ciudat mas poblada	Boston
Subdivisions	Connecticut, Maine, Massachusetts, Nueva Hampshire, Rhode Island y Vermont
Idioma oficial ; • Atros idiomas	Anglés ; Francés
Superficie; • Total	; 71 991.8 km²
Población; • Total (2019); • Densidat	; 14 845 063 hab. ; 76.7 hab/km²
	; Nueva Anglaterra en Estaus Unius

Nueva Anglaterra (New England, en anglés) ye una rechión d'os Estaus Unius localizada en l'extremo nord-este d'o país. Muga con Canadá por o norte, l'oceano Atlantico por l'este y por o sud, y o estau de Nueva York por l'ueste. Incluye, en orden orografico de nord-este a sudueste, os seis estaus de Maine, Nueva Hampshire, Vermont, Massachusetts, Rhode Island y Connecticut. Nueva Anglaterra no ye una división administrativa d'os Estaus Unius, sino una rechión cultural y historica. En os Estaus Unius, o termin yankee se fa servir ta referir-se a la chent de Nueva Anglaterra, ya sía de forma descriptiva coloquial u ta fer-les a mofla, mientres que en Nueva Anglaterra o mesmo termin s'emplegaba d'antis mas ta referir-se a os descendients dreitos d'os colonos orichinals angleses.

Ye a rechión d'os Estaus Unius con mayor nivel economico (47.100 dólars de renda por habitant) y calidat de vida. Tamién ye a rechión con mayor proximidat cultural a Europa (conserva orgullosament costumbres y tradicions dende os sieglos XVII-XVIII) y con un mayor livel cultural y educativo (seu d'os prestichiosos centros educativos de Harvard, Boston College, o Instituto Tecnolochico de Massachusetts, Brown University y Yale, entre d'atros). Tamién ye seu de centros de veraneyo reputaus y a sobén elitistas (New Haven en Connecticut, Newport en Rhode Island, Portsmouth en Nueva Hampshire, toz éls en a costa), como tamién atros centros de turismo y veraneyo menos elitistas como as islas de Martha's Vineyard y Nantucket, y centros mas populars como a peninsula de Cape Cod, a mayoría d'a costa de Maine y a mayoría d'a costa de Massachusetts, y centros de turismo d'agüerro (ta veyer o espectaclo d'as fuellas de colors, fenomeno dito en anglés "fall foliage") y d'hibierno, d'esquí, en os monts Apalaches a l'ueste d'a rechión. Nueva Anglaterra tien un 4,7 % d'a población d'os Estaus Unius (14,3 millons d'habitants), pero aporta o 5,5 % d'o PNB nacional.

Boston, con bels 600.000 habitants (5,8 millons en a suya aria metropolitana) ye o centro cultural ("capital cultural" d'os Estaus Unius) y industrial mas important d'a zona, asinas como a ciudat gran mas antiga d'os Estaus Unius. A rechión de Nueva Anglaterra ye poblada mas que mas (arredol d'un 90 %) por anglosaxons descendients d'europeus (bi ha una destacata minoria francofona en Maine y Nueva Hampshire). Destaca politicament por o suyo carácter progresista, estando un "feudo" d'o progresismo y d'o Partiu Democrata.

Orichinalment, Nueva Anglaterra nomás yera formada que por as colonias anglesas de Connecticut, Massachusetts, Nueva Hampshire y Rhode Island, pero dimpués d'un tiempo se subdividioron os territorios y hue a rechión entera incluye os estaus de Connecticut, Maine, Massachusetts, Nueva Hampshire, Rhode Island y Vermont.

Se veiga tamién

Datos: Q18389
Multimedia: New England / Q18389