Schwarzbulver

Schwarzbulverchörner

Schwarzbulver isch dr ersti Explosivstoff gsi, wo as Schiessbulver für Driiblaadige vo Schusswaffe verwändet worde isch. As Sprängbulver isch s e Sprängmiddel. Hüte wird s as Chorn- und Määlbulver hauptsächlig in dr Pyrotechnik und bsundrigs für Füürwärk verwändet.

Zämmesetzig

Schwarzbulver isch e pürotechnischi Mischig, wo us Kaliumnitrat (Kalisalpeter), Holzchoole, wo früener vor allem us em Holz vom Fuulbaum gmacht worde isch, und Schwääfel bestoot. Die durchschnittligi Zämmesetzig isch 75 % Salpeter (Kaliumnitrat), 10 % Schwääfel und 15 % Holzchoole, aber je noch däm für was es brucht wird, cha d Zämmesetzig e chli andersch si.

Dr Salpeter liiferet dr Suurstoff, s Choolebulver isch dr Brennstoff und dr Schwääfel isch Brennstoff und Sensibilisierer, für dass d Schwarzbulvermischig sofort foot afo brenne, au wenn nume en äinzige Funke uf sä fallt.

Härstellig

D Bestanddäil wärde meereri Stunde lang in ere Bulvermüüli fiin vermaalt und gliichmäässig vermischt. Denn wird s Gmisch füecht gmacht und in d Form vom ene Chueche brässt. Mä loot en lo dröchne, duet en no äinisch vermaale und bewaart s Bulver denn as Chörner oder as Määlbulver uf. Je noch dr Gröössi vo de Chörner verbrennt s Bulver underschiidlig schnäll.

Die chemischi Reakzion bim Verbrenne

Veräifacht bassiert daas:

$\mathrm {16\,C+4\,S+10\,KNO_{3}\rightarrow 15\,CO+K_{2}CO_{3}+4\,K_{2}SO_{3}+5\,N_{2}}$

Bim Verbrenne vo Schwarzbulver entstöön also Choolemonoxid, Kaliumcarbonat, Kaliumsulfit und Stickstoff. Was mit de Wasserräst im Bulver bassiert, wird in dere Formle nid berücksichdiget.

Litratuur

• Manuel Baetz: Schwarzpulver für Survival – Band 1 – Improvisation von Schwarzpulver und ähnlichen Mischungen. SurvivalPress, 2004, ISBN 3-937933-07-7. 
• Richard Escales: Schwarzpulver und Sprengsalpeter. SurvivalPress, 1914, ISBN 3-8330-1124-6 (Nachdruck 2003). 
• Thomas Fatscher, Helmut Leiser: Ausarbeitung zum neuen Waffenrecht. Krüger Druck + Verlag, Dillinge/Saar 2003, ISBN 3-00-012000-9. 
• Jochen Gartz: Vom griechischen Feuer zum Dynamit – Eine Kulturgeschichte der Explosivstoffe. E. S. Mittler & Sohn, Hamburg 2007, ISBN 978-3-8132-0867-2. 
• Fritz Seel: Geschichte und Chemie des Schwarzpulvers. Le charbon fait la poudre in Chemie in unserer Zeit 22 (1988), 9–16. doi:10.1002/ciuz.19880220103

Weblingg

• Encyclopaedia Britannica 1911: Gunpowder. Archiviert vom Original am 23. Mai 2012; abgruefen am 14. August 2008 (änglisch). 
• Handgonnes and Matchlocks: The History of Firearms to 1500. Archiviert vom Original am 19. Januar 2015; abgruefen am 14. August 2008 (englisch). 
• Ulrich Bretscher's Black Powder Page. Archiviert vom Original am 23. Mai 2012; abgruefen am 14. August 2008 (dütsch/änglisch). 
• Schwarzpulverinitiative. Archiviert vom Original am 14. September 2008; abgruefen am 14. August 2008 (deutsch). 
• Der Siegeszug des Schwarzpulvers im europäischen Bergbau. Abgruefen am 27. Oktober 2009 (dütsch). 
• Eric Hansen: Castles of the Fields. auf saudiaramcoworld (änglisch)

Fuessnoote

Dä Artikel basiert uff ere fräie Übersetzig vum Artikel „Schwarzpulver“ vu de dütsche Wikipedia. E Liste vu de Autore un Versione isch do z finde.