Nobling

Dr Nobling isch e Wysswy-Truube, wo us ere Chrüzig zwüsche Silvaner un Guetedel anno 1940 am Wiibauinstitut z'Friburg züchtet worre isch. Z'erst het er d'Zuchnummere Fr.128-40 trage, bevor er 1971 als abaufähigi Sorte erlaubt worre isch.

D'Farb isch hällgääl und dr Gschmack isch usszeichnet dur e fiini, fruchtigi Süüri und e liichte bis mittlere Körper , wo an Mirabelle und Pfirsich söll erinnere.

In Toplage erreicht dr Nobling in normale Johre ohni Probleme Öchslegrade vu 90 bis 110 un demit Spät- und Usläsiqualitäte. In mindere Lage oder bi ere z'grosse Mengi chummt er degege grad in d'Kabinettqualität.

Er wird vorwigend im Markgräflerland abaut. Au Sekt wird us dere Truube hergstellt.

Nobling bruucht fer e guete Wy gueti Lage. Leider isch er au in schlechtere Lage abaut worre un het dorum e schlechte Ruef kriegt. Er isch dorum schwer verkäuflich worre. Ufgrund vu dr guete Qualität vu dr Truube isch dr Nobling dorum verstärcht versektet worre.

E Noochdeil vu dr Noblingräbe sin ihri Ranke. Nobling het e starchi Rankebildig un mer bruucht ebba dreimol so lang zum Schniide wie fer Burgunder, ebba doppelt so lang wie bim Guetedel und eineihalbmol so lang wie bim Müller-Thurgau.

Nobling isch im Winter eweng frostempfindlicher wie anderi Rebsorte. So hän d'Starchfröst in dr Middi vu dr 1980er Johre dr Nobling-Räbe stärcher zuegsetzt wie andere Sorte.

E bsunderi Charakteristik vu dr Noblingräbe isch e starch uregelmässige Ustriib. Während anderi Sorte d'Schoss gliichmässig ustriibe düen, isch dr Nobling später un menki Auge sin scho witt ustriibe, anderi degege grad in dr Wulle. Des gliicht sich aber bis zue dr Blüeti us.

D'Noblingtruube isch eweng grösser wie sälli vum Müller-Thurgau.

In dr ledste Johre isch d'Abauflächi vum Nobling starch zruckgange zue Gunste vu besser verkäufliche Sorte wie Burgunder un Guetedel. 2001 het d'Abauflächi noch ca. 95 ha betrage un isch sither witter gschrumpft.