Midgard

Midgard isch en Begriff us de germanische Kosmologi und Mythologi und bizaichnet d Welt wo d Mensche wonet.

De Name chunnt i allne germanische Sprooche vor (germ. *miðjanagarðaz m. »Mittelchrais«; got. midjungards; an. miðgarðr; ae. middangeard; as. middilgard; ahd. mittingart, mittigart, mittilagart ) und stoot i de Geografii und Kosmologi för di biwonti Welt, wo vom Weltmeer umgee werd. De Begriff stoot analog zum latinische orbis terræ und em algriechische oikoumene. I de Mythologii cha Midgard as di mittleri Welt zwüschet de nidere Geisterwelt und de höchere Götterwelt bitrachtet werde, im christliche Kontext au d Welt zwüschet Himmel und Hell. De Uusdruck isch religiös noitraal gsii und isch drum au i biblische Tegscht bruucht woore, doch isch er im End us allne Sprooche dur s Word "Welt" ersetzt wore.

Nordischi Mythologi

I de nordische Mythologi isch Midgard aini vo de nüü Welte und de Wonort vo de Mensche. Er werd vom Weltmeer umgee, wo d Midgardschlange drin lit. Bi de Erschaffig vo de Welt hend d Götter Odin, Vili und Vei us de Augebraue vom Urriis Ymir en Schutzwall um Midgard baut. D Regebogebrugg Bilröst isch d Verbindig zwüschet Midgard und de Götterwelt Asgard.