Chraftort

E Chraftort isch e geographischi Örtlichkait, wo noch de Aasicht vo verschidnige Mensche, mit spirituelle, geomantische, oder magische Chräft uufglade sii söll. De Bsuech vom ene Chraftort chan en Mensch i de Regle mit positive Chreft oder Lebesenergii uuflade. Vili Chraftort sind hüüffig bsundrigi natürlichi Formatione, wie Berggipfel, Felse, Wäldli, Waldliechtige, Gwässer, aber au menschlichi Baute, wie Ruine vo Burge aber au bsundrigi Cherche oder anderi Hailigtümer. Nöd selte sind die Chraftort mit alte Saage verbunde.

Vili Chraftort sölet dezue no mitenand verbunde sii. Die Verbindigslinene, au lay-line gnennt, bildet ageblich geometrischi Muster uf de Landcharte.

Chraftort wered entweder intuitiv, maist noch ästhetische Kriterie, gfunde, oder dör bstimmti Praktike wi Pendle gortet. Verbraitet isch au, as e Chraftort gwertet werd, indem sini Straalig mit Bovis-Ainhaite (BE) aggee werd, wo aber kai wösseschaftlichi anerchannti Grössi isch. As de Ort mit de höchste Bovis-Ainhait i de Schwiiz werd Aesch bi Muur (Gmaind Muur) i de Forch im Kantoo Zöri aggee. De söll 750000 BE uufwiise, wäred s Groosmöister vo Züri 18000 BE haa söll.

Zo de bikanntiste Chraftort zäled Stonehenge z England, di ägyptische Pyramide oder d Externstai z Tütschland.

Im Buechhandel isch sit e paar Joor e Buum mit Büecher öber Chraftort z biobachte, wa dezue füert, as es immer mee ageblichi Chraftort gitt.