Sammy Mahdi

Dr Sammy Mahdi (* 21. Septamber 1988 z’ Ixelles/Elsene, Regioon Brüssel-Hàuiptschtàdt) ìsch a belgischer Politiker vu dr Pàrtäi Christen-Democratisch en Vlaams (CD&V). Ar ìsch ànna 2019 ìn d’ Belgischa Àbgoordnetakàmmer gwählt worra un ìsch ìm Oktoower 2020 Schtààtssekretäär fìr Àsyl un Wànderung ìn dr Regiarung De Croo worra.

Dr Sammy Mahdi.

Dialäkt: Mìlhüüserdiitsch

sii Laawa un Kàrriar

Jugend un Ààfàng ìn lokààla Politik

Dr Sammy Mahdi ìsch ànna 1988 z’ Ixelles/Elsene bii dr belgischa Hàuiptschtàdt Brüssel uff d’ Walt kumma. Ar ìsch dr Suhn vun’ra fläämischa Belgera un vu’ma schiitischer Iràker. Siina Fàmìlia müatterliigersitts schtàmmt üss Moerbeke-Waes ìm Oschtflandra, un siina Fàmìlia vàtterliigersitts kummt vu Basra ìm Süüda vum Iràk. Dr Vàtter ìsch àm And vu da 1970. Joohra àls Flìchtlìng ìm Belgia kumma —ar hàt d’ Diktàtüür vum Saddam Hussein gflechta. Uffgwàcksa-n-ìsch dr Mahdi z’ Brüssel; ar ìsch ìn a nìederlandischschprààchiga Schüal gànga. Ar hàt gsajt, àss’r ìn siinera Jugendsjoohra waga siinera Àbschtammung beschìmpft un benochtailigt worra-n-ìsch.

Dr Mahdi hàt z’äärscht Politikwìssaschàft àn dr nìederlandischschprààchiga Fräija Üniwärsiteet vu Brüssel gschtudiart. Ar hàt drnooh a Maischterpriafung vum internàzionààla un öiropäischa Racht bschtànda. Vu 2014 bis 2017 ìsch’r pàrlàmantàrischer Mìtàrwaiter biim fläämischa-n-Àbgoordnet Joris Poschet gsìì. Naawadràà ìsch’r ànna 2015 Mìtglìed ìn dr Jugendàbtailung vu dr fläämischa chrìschtdemokràtischa Pàrtäi Christen-Democratisch en Vlaams (CD&V) worra. Ìm März 2017 ìsch’r Vorsìtzender vu dara Àbtailung worra, un ìsch ìm Nowamber 2019 nochamol gwählt worra. Zwìscha 2015 un 2017 hàt’r àui z’ Molenbeek d’ Bezirksàbtailung vu dr CD&V glaita. Ar ìsch àwwer schpeeter uff Vilvoorde ìm Fläämisch-Brabant gwàndelt. Doo ìsch’r Laiter vu dr CD&V-Grupp ìm Gmaindaroot gsìì.

Ìm Sommer 2017 hàt dr Mahdi zamma mìt dr Jugendàbtailung vu dr CD&V s’ And vu da keenigliga Dotàzioona fìr dr Prìnz Laurent befìrwortet: Dr Prìnz hàt mehrera kineesischa Wìrdatraager ààgtroffa ghàà ohna Züaschtìmmung vu dr belgischa Regiarung.

Noh-n-em Uffrüahr vu màrokkànischa Füassbàllààhanger z’ Brüssel ìm Nowamber 2017 hàt dr Mahdi ìn dr Zittung Le Soir s’ „Gsìndel“ verpaitscht. Siina Kolumna hann ràdikàla Lìnkspolitiker kritisiart.

äärschta Schrìtta ìn federààla Politik

Ìm Oktoower 2019 hàt sìch dr Mahdi-n-uffgschtällt, fìr Pàrtäivorsìtzender vu dr CD&V wara. Ar hàt d’ ìnnera Schtrüktüür vu dr Pàrtäi wälla umschtälla, dänn sa säjga „veràltet“ gsìì. Ìn dr äärschta Runda vu dr Wàhl hàt’r 19 Prozant vu da Schtìmma bikumma, un ìn dr zwaita Wàhlrunda hàt’r numma 46,88 Prozant vu da Schtìmma bikumma; ar ìsch àlso vum Joachim Coens gschlààga worra.

Àn dr Pàrlàmantsàhl vu 2019 ìsch dr Mahdi Schpìtzakàndidàt vu siinera Pàrtäi ìm Fläämisch-Brabant gsìì un ìsch àls Àbgoordnet’r gwählt worra. Ìm März 2020 ìsch’r Fràkzioonsvorsìtzender vu dr CD&V ìm Pàrlàmant worra —wagadam ìsch’r àls Vorsìtzender vu dr Jugendàbtailung vu siinera Pàrtäi z’rucktratta.

Ìm März 2020 hàt dr Mahdi dr belgischa Juschtizminìschter Koen Geens ìm federààla Pàrlàmant àls ääarschter Schtällvertratter ärsätzt.

àls Schtààtssekretäär fìr Àsyl un Wànderung

Àm 1. Oktoower 2020 ìsch dr Mahdi àls Schtààtssekretäär fìr Àsyl un Wànderung ìn dr Regiarung De Croo ärnännt worra, àls Noohfolger vum Theo Francken. Àn dara Schtälla ìsch’r eewafàlls veràntwortlig fìr d’ Nàzionààllotrii. Dr Mahdi maint, àss d’ Üsswiisunga vu wìederrachtliga-n-Iiwànderer a wasentliger Tail vu dr belgischa Solidàriteetssyschtääm un Àsylpolitik sìnn. Ìn siina Àuiga soll s’ Belgia nìt verpflìchtet sìì, àlla Iiwànderer z’ ämpfànga. Ar wìll àwwer, àss d’ Àsylprozassverfàhra schnaller bhàndelt wara. Fìr dàs hàt’r a unàbhangig Audit-Büro um Hìlf gebeta.

Vu Mai bis Jüüli 2021 sìnn z’ Brüssel 456 wìederrachtliga-n-Iiwànderer ìm Hungerschtraik gsìì, fìr àss ma-n-ìhra Pàpirer ìn Ordnung brìngt. D’ Àkzioon hàt ìnnerhàlb vu dr Kìrich vum Hl. Johànnis dr Tàifer àn dr Beginhoof ìm Brüsseler Schtàdtzäntrum schtàttgfunda, so wia-n-uff da baida Glander vu dr Fräija Üniwärsiteet vu Brüssel. Dr Schtraik hàt a politischa Krisa ìn dr belgischa Regiarung üssgleest: zwai Sunderberìchter vu da Verainta Nàzioona hann gschrìewa, àss d’ belgischa Regiarung d’ Grundrachta vu da Iiwànderer àchta un ìn da Schtraiker ìhra Pàpirer ìn Ordnung brìnga soll. Züadam hann d’ Soziàlischta Pàrtäi un d’ Pàrtäi Ecolo-Groen, àss sa üss’m Regiarungsbìndniss z’rucktratta känna, wänn d’ Lààg schlìmmer wìrd. Dr Schtààtssekretäär Mahdi hàt z’äärscht mìt da Schtraiker nìt wälla verhàndla. Schpeeter hàt’r àwwer a „nöitrààla Zoona“ bii dr Kìrich loh iirechta, fìr ìn da Iiwànderer ärkläära, wia sa ìhra Pàpirer ìn Ordnung känna brìnga, wänn’s meeglig gsìì-n-ìsch. Doo hàt’r a Vertratter gsanda, fìr mìt da Schtraiker verhàndla, wo vu Veraina un vu’ma Priaschter unterschtìtzt worra sìnn. Naawadràà hàt’r a Kommünikàzioonskàmpània looh iifiahra, fìr àss ma nìt glàuibt, àss ma-n-àlla Iiwànderer ìhra Pàpirer ìn Ordnung brìnga wìrd. Naamlig hàt dr Mahdi gmaint, àss’s kää Üssnàhm vum Üsslanderracht gaa soll. Ìm Jüüli sìnn baida Sitta uff a Àbkumma ànakumma, fìr ìn ainiga vu da Schtraiker ìhra Pàpirer ìn Ordnung brìnga un dr Schtraik schluss màcha. Noh dr Protäschtàkzioon sìnn dr Mahdi un d’ viar Vertratter dur dr Üssschuss fìr Ìnnera Ààglagahaita vu dr belgischa-n-Àbgoordnetakàmmer verheert worra. Ìm Dezamber 2021 hann fìmfa vu da Schtraikenda dr Schtààt verklàgt, dänn d’ Regiarung hatt s’ Àbkumma nìt räschpaktiart. Doo drbii sìnn sa vu zwai Veraina unterschtìtzt worra. Ìm Nowamber hann ainiga vu da Schtraiker nochamol ààgfànga ghàà, ìn dr Beginahoofskìrich z’ schtraika.

Ìm Àuigscht 2021, kurz vor äbb d’ Taliban d’ àfghànischa Hàuiptschtàdt Kabul äroowert hann, hàt dr Mahdi dr öiropäischa Schtällhàlta-n-àbkumma um d’ Üsswiisunga ìns Àfghànischtàn àbglahnt. Ar hàt behàuiptet, àss „fìr bschtìmmta Persoona, ìn bschtìmmta Regioona, a Ruckkehrpolitik meeglig sìì soll“. Ar hàt a Briaf àn d’ Öiropäischa Kummissioon gschrìewa, fìr Leesunga ìm Iràn un ìm Pakischtàn befìrworta. Siina Mainung ìsch unteràndrem vu da Mänscharachtsorgànisàzioona ECRE un Amnesty International kritisiart worra. Àlso hàt dr Mahdi gsajt, àss dr Schtààt dr Mainung vum belgischa Generààlkummissàriàt fìr Flìchtlinga un Schtààtsloosa (CGRA/CGVS) folga wìrd.

Wahrend siim Àmtszitt àls Schtààtssekretäär hàt dr Mahdi mehrera Àbkumma mìt Orgànisàzioona so wia mìt da nochberliga Lander unterzaichnet. Àm 26. Oktoower 2021 hàt’r zamma mìt’m Nìederland un em Luxemburg a Àbkumma-n-unterzaichnet, fìrs Zammaschàffa zwìscha da dräi Lander ìm Rààhma vu da öiropäischa Dublin-Verordnunga z’ verschtärka. Àm 16. Dezamber 2021 hàt’r a Vertrààg mìt’m Öiropäischa-n-Unterschtìtzungsbüro fìr Àsylfrooga (EASO) unterzaichnet, fìr àb Janner 2022 ìn da belgischa Beheerda hìlfa, d’ Àsylbewarwer z’ ämpfànga. A pààr Taag schpeeter, àm 24. Dezamber, hàt’r a Àbkumma mìt dr kàthoolischa Gmainschàft Sant’Egidio unterzaichnet, fìr a humànitäära Durchgàng iirechta fìr äbb 250 verwundbàra Flìchtlìnga, wo Sìcherhait ìm Belgia fìnda wälla.

Àls Schtààtssekretäär fìr Àsyl un Wànderung hàt dr Mahdi d’ Ruckkehrpolitik vum Belgia verschtärkt: Ìm Joohr 2021 hann 5.340 Üsslander s’ Lànd müassa fàraloh. Ìm Oktoower 2021 hàt dr Mahdi s’ äärschta regionààla Ruckkehrbüro loh äffna, fìr ìn da àbgwìesena Iiwànderer uff’m Ruckkehr ìns Lànd beglaita. Ìm gliicha Monet hàt’r àui a Informàzioonskàmpània uff da soziààla Nätzwark loh iifiahra, fìr ìn da àlbànischa Iiwànderer drvu awagbrìnga, ìm Belgia Àsyl z’ bewarwa. Dr Mahdi hàt àui zwai umschtrìttena främda moslämischa Preediger wälla üsswiisa: Ìm Jüüni 2021 hàt’r z’äärscht versüacht, dr màrokkànischa Imam Abdallah Ouahbour üssz’wiisa —dr Ouahbour hann d’ belgischa Sìcherhaitsbeheerda àls a gfoohrliger Hàsspreediger bschrìewa ghàà. D’ Üsswiisungsààtrààg ìsch àwwer vu’ma federààla Grìcht àbglahnt worra. Ìm Janner 2022 ìsch’s àwwer ìm Mahdi glunga, dr umschtrìttena Imam Mohamed Toujgani üss’m Lànd üssz’wiisa, wo-n-eewafàlls a Hàsspreediger gsìì säjg.

Wahrend ìm Mahdi siim Àmtszitt ìsch s’ belgischa Àsylsyschtääm ìwwerlàschta gsìì. D’ belgischa Regiarung un dr Schtààtssekretäär Mahdi sìnn mehrmols vun Orgànisàzioona verklàgt worra, wial ìm Belgia vìel Àsylbewarwer —drunter unbeglaiteta Mìnderjahriga— uff dr Schtrooss schloofa. Ìm Janner 2022 ìsch dr belgischa Schtààt vu’ma federààla Grìcht verurtailt worra, dänn’r hàt geega s’ internàzionààla Àsylracht verschtoossa. Ìm Hornung 2022 hàt dr Mahdi a Äntschaidung vu’ma Rìchter ààgfachta, wo gsajt hàt, àss s’ Belgia ìn da Iiwànderer, wo schun Àsyl ìn’ma àndra EU-Lànd erhàlta hann, a Uffnàhmaplàtz züawiisa müass.

Àm 12. Janner 2022 hàt Schtààtssekretäär Mahdi zamma mìt dr Àrwetsminìschtera Hilde Crevits a Àkzioonsplàn vorgschtällt, fìr d’ Àsylbewarwer bassr ìn dr Àrwetsmàrkt integriara. Dr Plàn, wo „Asylum see match“ haisst, ìsch unteràndrem vum Fedasil äntwìckelt worra, ìn Zammaschàffa mìt Unternamma. Üsserdam hàt dr Sammy Mahdi d’ Grundsatz vu’ma „Wànderungsbüach“ vorgschtällt, wo-n-àm 4. Hornung 2022 vum belgischa Minìschterroot biigschtìmmt worra-n-ìsch. S’ Ziel vum Büach ìsch, s’ belgischa Wànderungsracht z’ verbässera un uffhala verschtandlig z’ màcha. Äntwìckelt worra-n-ìsch’s vun’ra unhàbhangiga Kumissioon mìt Rachtsprofasser, Schtààtsbeheerda un Veraina, wo ìn da Iiwànderer halfa. Dajeenig Büach hann d’ vorhaariga Regiarunga wälla vorschtälla ghàà, hann’s àwwer nìt gmàcht ghàà.

Sunschtigs

Dr Sammy Mahdi reedet fliassend nìederlandisch un frànzeesch. Sitter 2016 schribbt’r uff a reegelmaassiga-n-Àrt àls Kronìscht fìr d’ nìederlandischschprààchiga Zittung De Morgen.

Ìm Joohr 2017 hàt dr Sammy Mahdi àn dr bekànnta fläämischa Farnsahsandung De Slimste Mens ter Wereld mìtgmàcht; doo hàt’r sii Hund mìtgbràcht.

Weblinks

 Commons: Sammy Mahdi – Sammlig vo Multimediadateie

• Dr Sammy Mahdi uff dr offiziälla Websitta vu dr belgischa federààla Regiarung (frànzeesch, nìederlandisch)
• Ìm Sammy Mahdi siina offiziälla Websitta (nìederlandisch, frànzeesch)
• Ìm Sammy Mahdi siina offiziälla Websitta àls belgischer Schtààtssekretäär (hochdiitsch, nìederlandisch, frànzeesch, anglisch)