Quorte

Quarten
	Wappe vo Quarten
Basisdate
Staat:	Schwiiz
Kanton:	St. Galle (SG)
Wahlchrais:	Sarganserland
BFS-Nr.:	3295
Poschtleitzahl:	8877 Murg; 8878 Quinten; 8882 Unterterzen; 8883 Quarten; 8884 Oberterzen; 8885 Mols
Koordinate:	736233 / 218113Koordinate: 47° 6′ 0″ N, 9° 14′ 0″ O; CH1903: 736233 / 218113
Höchi:	548 m ü. M.
Flächi:	61.90 km²
Iiwohner:	3000 (31. Dezämber 2022)
Website:	www.quarten.ch
Charte
	Charte vo Quarten

Quorte isch e Gmeind vom Kanton Sanggale.

Geografy

D Gmeind lyt im sanggallische Wahlchreis Sargaaserland.

Zu dr Gmeind Quorte ghöre d Dörfer Oberterze, Unterterze, Quorte, Quinte, Mols, Murg und Tannebodenalp. Mid Usnaam vo Quinte liget die alli am südlechen Ufer vom Waalesee. Uf Quinte cha mer nume z Fuess oder mit em Schiff goo.

Bi Murg chunt s Murgtaal vo Süüde an See abe, wo wyt obe bi de Murgseeè afoot.

D Tannebodenalp lyt bim Feriegebiet vo de Flumserbärge. A dr Kantonsstrooss und bim Baanhof vo Underterze isch d Taalstazioon vo dr Säilbaan uf Oberterze, und vo doo us en zweiti Sekzioon mit ere Säilbaan uf d Tannebodenalp. Obedra lyt dr weschtlech Deil vom Schyareal vo d Flumserbärge mit dr Bärgstazioon ufem Maschgechamm im Gmeindbann vo Quorte. S ganze Wintrsportgebiet wird vo de ”Bärgbaane Flumserbärg“ betriibe.^[2]

Gschicht

Mols isch im ene Dokumänt vo ane 1178 s erschte Mol erwäänt. Murg chunt scho inere Kwelle vo ayne 1045 vor.

Sid ane 1986 goot d Autobaan A 3 em Walesee noo bi Quorte verby. Wil d Bärglandschaft bis zum See abe so stotzig isch, het me d Autobaan elei uf em Gmeindgebiet vo Quorte dur föif Dunnel müesse füere. D Ysebaanlinie vo Züri uf Chur, wo ane 1859 fertig bout gsi isch, lyt i dem Abschnidd fasch ganz am Seeufer. Es het do grad drüü Stazioone: die vo Murg, die vo Underterze und die vo Mols.