Johann-Andreas-Schmeller-Gesellschaft
| Dialäkt: Undermarkgreflerisch |
D Johann Andreas-Schmeller-Gesellschaft e. V. isch e gmeinnitzge Verein mit Sitz im bayrische Tirschenreuth, wu zum Ziil het, dr Noolass vum Johann Andreas Schmeller z erforsche un in dr Tradition vum Schmeller d Dialäktforschig z ferdere.
Im Ramme vu dr „Universitätstage Bayreuth“ 1979 isch d Schmeller-Gsellschaft am 17. Novämber 1979 z Tirschenreuth grindet wore. Dr Ereffnigsvordrag het dr Prof. Hinderling vu dr Universitet Bayreuth ghalte, au iber d Satzig isch d Schmeller-Gsellschaft äng an die Universitet bunde, mer het ihre di wisseschaftli Begleitig un Berotig iberdrait. D Universitet Bayreuth isch e korporativ Mitgliid vu dr Schmeller-Gesellschaft, dr domolig Bresidänt vu dr Universitet, dr Klaus Dieter Wolf, isch eis vu dr erschte Mitgliider gsi.
D Gsellschaft isch au grindet wore as Organisationsforum fir d Fyyr vum 200. Geburtsdag vum Schmeller anne 1985.
Im Grindigsvorstand isch dr Robert Hinderling erschte Vorsitzende gsi, dr Tirschenreuther Burgermeischter Ludwig Wolfrum dr zweet Vorsitzende, dr Kreisheimetpfleger Franz Busl dr erscht Schriftfierer, dr Schuelamtsdirektor Hans Haberkorn dr zweet Schriftfierer un dr Oberamtsrot Josef Reber dr Schatzmeischter.
Syt dr Grindig wird d Position vum zweete Vorsitzende immer vum Tirschenreuther Burgermeischter yygnuu, dr Schatzmeischter isch immer eber us dr Tirschenreuther Stadtverwaltig.
D Schmeller-Gsellschaft veraastaltet Läsige, Vordreg, Uustellige un Fachdagige zum Thema. In ihre Johrbiecher vereffetligt si Arbeite zue dr Dialäktforschig un syter anne 1985 verleit si all zwei Johr dr Schmeller-Bryys, wu mit 2000,- € dotiert isch. Go s Inträssi fir dr Schmeller au bi Gymnasiaschte z wecke, wird syt 2011 alljohr ne Schmeller-Bryys fir seli gueti Facharbete vergee.
Vorsitzer
ändere- Robert Hinderling (1979–1990)
- Werner Winkler (1990–1996)
- Hans-Bernd Schmeller (1996–2002)
- Beatrix Dürrschmidt (2002–2005)
- Christian Ferstl (syt 2005)
Weblink
ändere- Internetuffdritt vu dr Schmeller-Gesellschaft e. V. Tirschenreuth