S «Huus zum Raab» z Baasel
S «Huus zum Raab» isch e barocks Bauwärk an dr Aeschevorstadt 15 z Baasel. Es ghöört zu de Kulturgüeter im Kanton Baasel-Stadt, wo nazionali Bedütig häi.
| Dialäkt: Baseldütsch |
S «Zum Raab» isch um 1764[1] vom Samuel Werenfels[2] für e Bankiee Felix Battier baut worde, öbbe zwäihundert Meter vom Aeschedoor in dr Richdig zur Freije Strooss am Blatz vom Gasthoof «Zum Rappen»,[3][4] und umfasst drei früeneri Liigeschafte. Dr Gaarde eläi het elf Parzälle iignoo.[5] S Huus isch im Stiil vom Barock baut, het drei Stöck, und bestoot us drei Geböiddräkt um en Eerehoof ume.[6] Es het e Balkon über em Iigangsdoor und jeedi Mängi Mansardefänster uf em Dach. 1766 het dr oberschwööbisch Mooler Joseph Esperlin (1707-1775) im «Raab» e Fresko gmoolt: d Verherrlichung der Tugenden und Sturz des Lasters.[7] 1785 het dr Battier s Bankhuus Felix Battier und Ehinger gründet, wo si Sitz im «Huus zum Raab» gha het.[8]
S Huus lit grad näben em «Huus zum Paradiis» im Baasler Banke- und Versicherigskwardier zwüsche dr Baasler Kantonalbank und dr UBS und isch dr Sitz vo dr «Fondation Thorens», wo Künstler in Noot understützt.[9]
Fuessnoote
ändere- ↑ Schweizerische Bauzeitung, Band 88, Druckt vom H. Zürcher, 1926, S.337
- ↑ Helen Vischer, Irène Zurkinden: Basel, Origo Verlag 1956 , S.48. Öbs aber dr Werenfels wirklig baut het, isch nid sicher, lueg André Renaud, Paul Erismann: Schweizer Heimatbücher, Usgoob 30-43, S. 19
- ↑ Eugen A. Meier: Basel einst und jetzt: der Wandel des Basler Stadtbildes im Lauf der Zeit, Buchverlag Basler Zeitung, 1994, S.115
- ↑ Dr Naame vom «Zum Rappen» isch woorschiinlig en äigewilligi Schriibig vo «Zum Raben». Noch ere Zäichnig vom J. H. Glaser isch 1645 uf em Ushängschild vom Gasthoof e Raab abbildet gsi (Das Bürgerhaus in der Schweiz, Band XXIII - Kanton Basel-Stadt, 3. Teil, und Kanton Basel-Land. Orell Füssli, 1931)
- ↑ Michael Gasser, Marianne Härri: Die Basler Aeschenvorstadt: Bausteine einer wachsenden Stadt, C. Merian, 2001, S. 22
- ↑ Lukas Gloor: Knaurs Kulturführer in Farbe, Schweiz, Droemer Knaur, 1982, S.58
- ↑ de:Joseph_Esperlin, uf dr dütsche Wikipedia
- ↑ Gründer und Anfänge der Bank Sarasin in Basel uf altbasel.ch, abgrüeft am 5. April 2014
- ↑ Website vo dr Fondation Thorens, abgrüeft am 5. April 2014
Koordinate: 47° 33′ 11,5″ N, 7° 35′ 34,4″ O; CH1903: 611612 / 266952