Habsburger Urbar

S Habsburger Urbar isch es Verzeichnis vo de Güeter, wo d Habsburger i dr Schwiiz, im Elsass und i de übrige Deil vo de Vorland gha händ.

s Habsburger Urbar, Badischi Landesbibliothek Karlsrue, Cod. Donaueschingen 691, fol. 27v.

D Vorlaage für das Buech sind vo 1303 bis 1307 zämegstelt worde. Do drfür sind Amptslüüt vo de Habsburger i alli Gägete ggange d Lüüt go frooge, was für Psitz und Zins em habsburgische Hoof ghöret. D Lischte mit dene Notize het me öppe 1330 ines grosses Buech abgschribe.

Das Urbarbuech isch im düütschsprochige Gebiet eini vo de beschte Rächtskwelle vo dere Zyt.

Es isch für die habsburgisch Verwaltig im Burgarchyv vom Schtei z Bade ufbewahrt worde. Wo d Eidgnosse s habsburgische Gebiet im Aargau und au d Burg Schtei eroberet händ, isch das wärtvolle Buech uf Luzärn choo. 1480 het dr Diebold Schilling für d Öschtrycher en Abschrift drvo gmacht.

Literatur

• Marianne Bärtschi: Das Habsburger Urbar, vom Urbar-Rodel zum Traditionscodex. Zürich 2008.
• Franziska Hälg-Steffen: Habsburgisches Urbar. In: Historisches Lexikon vo dr Schwiiz.