Gaan na inhoud

Russiese Rugbyunie

in Wikipedia, die vrye ensiklopedie
Die drukbare weergawe word nie meer ondersteun nie en kan leweringsfoute hê. Dateer asseblief jou blaaierboekmerke op en gebruik asseblief eerder die verstekblaaierdrukfunksie.
Russiese Rugbyunie
Kenteken van die Russiese Rugbyunie
Kenteken van die Russiese Rugbyunie
Russiese naam Союз регбистов России
Afkorting FRR
Land Vlag van Rusland Rusland
Sportsoorte Rugby, Sewesrugby
Stigting 1936
Lid van Wêreldrugby
Aangesluit in 1990
Vastelandse beheerliggaam Rugby Europa
President Igor Artemjef
Setel Moskou, Rusland
Amptelike taal Russies
Amptelike webwerf rugby.ru

Die Russiese Rugbyunie (Russies: Союз регбистов России, afgekort “FRR”) is die bestuursliggaam wat rugby en sewesrugby in Rusland beheer. Die beheerliggaam is in 1936 gestig en in Moskou gesetel. Sedert 1990 verteenwoordig dit Rusland by Wêreldrugby en sedert 1992 ook by Rugby Europa (“RE”). Sedert die Russiese inval in Oekraïne in 2022 is die land van die internasionale spelbedryf uitgesluit.

Geskiedenis

Die Russiese Rugbyunie is in 1936 gestig en het in 1990, voor die Ontbinding van die Sowjetunie, ’n volle lid van die Internasionale Rugbyvoetbalraad (IRVR, nou Wêreldrugby) geword.[1] Twee jaar later het die Russiese Rugbyunie by die vastelandse beheerliggaam Fédération internationale de rugby amateur (FIRA, nou Rugby Europa) aangesluit.[2]

In reaksie op die Russiese inval in Oekraïne sedert 2022 is die Russiese Rugbyunie se Wêreldrugby-lidmaatskap in ooreenstemming met ander sportbeheerliggame opgeskort en die nasionale span van die Europese Rugbykampioenskap uitgesluit, waarmee hulle nie meer vir die Rugbywêreldbeker 2023 in Frankryk kon kwalifiseer nie.[3][4] Die nasionale span is voorheen deur die vastelandse beheerliggaam Rugby Europa geskors.[5] Vervolgens is al die oorblywende wedstryde van Rusland as nederlae geag.[6]

Taak

Die Russiese Rugbyunie organiseer verskeie nasionale spanne, insluitend Rusland se nasionale seniorrugbyspan vir mans (die Bere), vroue en jeug. Die FRR hou ook toesig oor sewesrugby in Rusland en aangesien dit ’n Olimpiese sportsoort is, werk hulle met die Russiese Nasionale Olimpiese Komitee saam. Naas die amptelike nasionale span roep die Russiese Rugbyunie ook ander keurspanne byeen. Daarbenewens bestuur die beheerliggaam kinder- en jeugrugby in Rusland. Kinders en jongmense word reeds op skool aan rugby bekend gestel en na gelang van hul belangstelling en talent begin hul met hul afrigting. Net soos ander rugbylande beskik Rusland oor ’n o/20-nasionale span wat aan die Wêreldrugby o/20-kampioenskap deelgeneem het.[7]

Die beheerliggaam reël ook die plaaslike kompetisies. Die hoogste rugbyliga in Rusland is die professionele Russiese Rugbykampioenskap (Чемпионат России по регби), waaraan nege spanne deelneem. Weens die beter finansiële moontlikhede het baie spelers egter ’n loopbaan verkies by ’n klub in Frankryk of ’n ander Wes-Europese land. Die meeste nasionale spelers wat nie by ’n Wes-Europese klub betrokke was nie, het gespeel vir die professionele spanne Jenissei-STM Krasnojarsk en Lokomotief Penza wat in 2021 aan die Rugby Europa Superbeker deelgeneem het.

Kenteken

Die nasionale span se bynaam Medwedi (“die Bere”) is ontleen aan die nasionale dier, die Russiese beer. Die Russiese Rugbyunie toon derhalwe ’n gestiliseerde beerkop.

Verwysings

  1. ↑ (en) "Russia". Wêreldrugby. Besoek op 29 Maart 2024.
  2. ↑ (en) "Rugby Europe Members". Rugby Europa. Besoek op 29 Maart 2024.
  3. ↑ (en) Daniel Gallan (1 Maart 2022). "World Rugby joins other sports bodies by suspending Russia and Belarus". The Guardian. Besoek op 29 Maart 2024.
  4. ↑ (en) "World Rugby confirms sporting sanctions for Russia and Belarus". Wêreldrugby. 1 Maart 2022. Besoek op 29 Maart 2024.
  5. ↑ (en) "Rugby Europe Statement". Rugby Europa. 26 Februarie 2022. Besoek op 29 Maart 2024.
  6. ↑ (en) "Georgia qualify for Rugby World Cup 2023". rugbyworldcup.com. 10 Maart 2022. Besoek op 29 Maart 2024.
  7. ↑ (en) "World Rugby U20 Championship". Wêreldrugby. Besoek op 29 Maart 2024.

Eksterne skakels

Ontsluit van "https://af.wikipedia.org/w/index.php?title=Russiese_Rugbyunie&oldid=2667489"