Wittenberg

Lutherstadt Wittenberg
Kaart	Wapen
	Vlag
Land	Duitsland
Deelstaat	Sakse-Anhalt
Koördinate	51°31′N 12°23′E
Stigting	10de eeu
Stadstatus	27 Junie 1293
Oppervlakte:
- Totaal	240,32 vk km
Hoogte bo seevlak	67 m
Bevolking:
- Totaal (31 Desember 2010)	49 496
- Bevolkingsdigtheid	206/vk km
Tydsone	UTC +1 (MET)
- Somertyd	UTC +2
Klimaat
- Tipe	Gematigde klimaat
- Gemiddelde jaarlikse temperatuur	8,7 °C
- Gem. temp. Januarie/Julie	-0,8 / 18 °C
- Gemiddelde jaarlikse neerslae	563 mm
Burgemeester	Eckhard Naumann (SPD)
Amptelike Webwerf	www.wittenberg.de

Wittenberg, amptelik Lutherstadt Wittenberg, is die administratiewe setel van die gelyknamige distrik in die oostelike deel van die Duitse deelstaat Sakse-Anhalt. Wittenberg is aan die Elberivier geleë tussen Dessau-Roßlau in die weste, die Fläming in die noorde, die Dübener Heide in die suide en die Elbe-Elster-streek in die ooste, rofweg 100 kilometer suid-wes van Berlyn en sowat 70 kilometer noord-oos van Leipzig.

Wittenberg het in die 16de eeu danksy sy politieke en kultuurhistoriese invloed en sy kunslewe 'n belangrike rol in die geskiedenis van Duitsland gespeel. 'n Aantal beduidende geboue, wat met die Protestantse Hervorming in die 16de eeu en die kerkhervormers Martin Luther en Philipp Melanchthon asook die kunstenaar Lucas Cranach vereenselwig word, is in die ou stad van Wittenberg geleë en lok besoekers van dwarsoor die wêreld. Die Lutherhuis, die Melanchthonhuis, die stads- en slotkerk maak as Luthermonumente sedert 1996 deel uit van die UNESCO-wêrelderfenis.

Wittenberg was die hoofstad van die historiese Kurkreis-streek en die administratiewe setel van die hertoë en keurvorste van Sakse-Wittenberg. Met die nywerheidsomwenteling het Wittenberg tot 'n sentrum van die chemiese bedryf en 'n spoorwegknooppunt langs die treinroetes tussen Berlyn en Leipzig en tussen Maagdenburg en Dresden ontwikkel.