Lloyd Loom
![](http://upload.wikimedia.org/wikipedia/commons/thumb/9/92/Sheppard-03.jpg/220px-Sheppard-03.jpg)
Die Lloyd Loom-weeftegniek is in 1917 deur die Amerikaner Marshall B. Lloyd gepatenteer. Hy het kraftpapier om 'n metaaldraad gedraai, die papierdrade op 'n weefgetou opgestel, en 'n aaneenlopende stuk materiaal, wat as die tradisionele Lloyd Loom-stof bekend geword het, geweef. Die stewige, dog buigsame Lloyd Loom-stof word geknip en oor buighoutraamwerke getrek en vasgekram, om 'n verskeidenheid meubels en huishoudelike voorwerpe te maak. Lloyd Loom-stoele het vinnig baie gewild in die Verenigde State geraak.
Lusty Lloyd Loom
In 1921 het Marshall B. Lloyd die Britse regte aan W (William) Lusty & Seuns verkoop, wat die Lloyd Loom-stof gebruik het om 'n reeks meubels met eenvoudiger ontwerpe, as die oorspronklike Amerikaanse meubelstukke, te skep. Tydens die 1930s het Lloyd Loom-meubels 'n hoogtepunt van gewildheid bereik, en is dit in hotelle, restaurante en teekamers, sowel as aan boord van 'n Zeppelin en passasierskepe gebruik, sodat dit 'n huishoudelike naam geword het. Die Lusty-familie het meer as 'n duisend ontwerpe ontwikkel, en meer as tien miljoen Lusty Lloyd Loom-meubelstukke is voor 1940 in Amerika en Groot-Brittanje gemaak.
Teen 1933 was daar meer as 400 ontwerpe in die Lusty Lloyd Loom-katalogus. 'n Bomaanval in 1940, tydens die Tweede Wêreldoorlog, het die fabriek in Oos-Londen, waar die goedere vervaardig is, verwoes. Die besigheid is weer in 1951 op die been gebring, maar die na-oorlogse toestande het verkope nadelig beïnvloed.
Geoffrey Lusty, 'n kleinseun van William Lusty, wat die onderneming begin het, het die produksie in die laaste dekade van die twintigste eeu laat herleef deur produksie na die Verre Ooste te verskuif. Alhoewel die produksiestandaarde so goed soos die oorspronklike was, en al die artikels volgens die oorspronklike W Lusty & Sons-ontwerpe gemaak is, het die verkope nie in die Verenigde Koninkryk gevorder nie, en in 2008 het die onderneming adviseurs versoek om 'n nuwe eienaar te kry. In Julie 2008 het W Lusty & Sons die Lusty Furniture Company geword, gerugsteun deur private beleggers wat graag die nalatenskap van Marshall B Lloyd, die uitvinder van Lloyd Loom, wou bewaar. Die nuwe eienaars het die katalogus met die oorspronklike ontwerpe weer uitgegee, en die produksie van die meubels in Indonesië voortgesit. Hulle het dit ook moontlik gemaak om die oorspronklike ontwerpe in enige kleur te bestel, soos wat W Lusty & Seuns dit in 1922 aangebied het.
![](http://upload.wikimedia.org/wikipedia/commons/thumb/3/3e/Sheppard-02.jpg/220px-Sheppard-02.jpg)
Sommige vervaardigers en kleinhandelaars het sedertdien sintetiese vesels, wat op die oorspronklike Lloyd Loom-stof gebaseer was, ontwikkel. Die sintetiese weergawes word veral vir buitelewe-meubels gebruik.
Die grootste gedeelte van die huidige wêreldwye Lloyd Loom-produksie vind in Indonesië, China en Vietnam plaas. Alhoewel Lloyd Loom op 'n klein skaal in die Verenigde Koninkryk vervaardig word, word die meeste Lloyd Loom-ondernemings en kleinhandelaars as invoerondernemings bedryf, met die oorgrote hoeveelheid Lloyd Loom-meubels wat in die Verre Ooste vervaardig word.
Verwysings
1. Curtis, Lee J (1997). Lloyd Loom woven fibre furniture (2nd ed.). London: Salamander Books. ISBN 0861019407.